Shteti mbi 300 milionë euro borxhe bizneseve dhe qytetarëve
Raporti i Auditimit për vitin 2019 nga Zyra Kombëtare e Auditimit ka gjetur se shteti i ka borxh bizneseve dhe qytetarëve mbi 300 milionë euro.
Sipas këtij Raporti, borxhi apo ndryshe që njihen si detyrimet e papaguara paraqesin faturat e pranuara për punët apo shërbimet e përfunduara nga operatorët e ekonomik, por të cilat nuk janë paguar. Për shkak të përdorimit të kontabilitetit në para të gatshme, gjendja e detyrimeve të papaguara mund të shpaloset në pasqyrat financiare.
Rrjedhimisht, ato përpunohen në mënyrë manuale nga organizatat buxhetore dhe raportohen në baza mujore në Ministrinë e Financave.
Detyrimet totale të papaguara sipas auditimit janë 310 milionë e 565 mijë e 520 euro, ndërsa në raportin e konsoliduar financiar, detyrimet e papaguara janë paraqitur në shumën 360 milionë e 550 mijë e 906 euro, vlerë kjo që sipas auditimit është e mbivlerësuar për 49 milionë e 416 mijë e 950 euro. Krahasuar me vitin paraprak, detyrimet janë rritur 39%.
Borxhet e shtetit ndaj bizneseve në nivelin qendror
Vlera totale e borxhit të shtetit ndaj bizneseve në nivelin qendror, sipas Raportit Financiar Vjetor raportohet të jetë 337 milionë e 202 mijë e 119 euro, e që sipas Auditorit, duhet të paraqitej në vlerë prej 287 milionë e 785 mijë e 169 euro. Si rezultat i kësaj, obligimet janë mbivlerësuar për 49 milionë e 416 mijë e 950 euro.
Sipas Raportit të Auditorit, kjo ka ndodhur për shkak të cilësisë së dobët në mbledhjen, konsolidimin dhe raportimin e shënimeve në organizata.
Gabime të tilla kanë ndodhur për shembull në Ministrinë e Mjedisit dhe Planifikimit Hapësinor (MMPH), e cila ka paraqitur afërsisht 32 milionë e 235 mijë e 037 euro obligime më shumë në Pasqyrën Vjetore Financiare. Kjo, sipas Auditorit, ka ndodhur për shkak të pakujdesisë së zyrtarit financiar i cili ka prezantuar dy herë kërkesat e shpronësimit në raportin e obligimeve dhe rrjedhimisht këto shënime janë bartur edhe në Raportin Vjetor Financiar.
Ndërsa në Ministrinë e Infrastrukturës, Auditori ka gjetur se ishin nënvlerësuar borxhet për 894,983 euro, të cilat janë deklaruar më pak në Pasqyrat Financiare Vjetore.
Borxhet e shtetit ndaj bizneseve në nivelin lokal
Gabime në raportin janë dukshëm të theksuara edhe në nivelin lokal.
Sipas Auditorit janë nga Komuna e Prizrenit, që kishte mbivlerësuar detyrimet për 760,579 euro. Këto detyrime, sipas Auditorit, nuk plotësonin kriteret për cilësimin e tyre si detyrime të papaguara në Pasqyrat Financiare Vjetore të vitit 2019. Faturat e prezantuara si detyrime, nuk ishin fatura që i takonin vitit 2019.
Komuna e Kaçanikut e cila i kishte nënvlerësuar për 202,213 euro, pasi kishte një vendim gjyqësor/përmbarimor të përmbarueshëm. Sipas ZKF, kjo ishte edhe arsyeja e mos shpalosjes.
Komuna e Mitrovicës Jugore, kishe nënvlerësim për 11,873 euro obligim ndaj të punësuarve në fund të vitit 2019.
Komuna e Malishevës, kishte mbivlerësuar detyrimet për 21,553 euro. Kjo ka ndodhur për shkak të mosfunksionimit të kontrolleve të brendshme të komunës, ku fatura e raportuar si e pa paguar në vlerë 15,001 euro ishte paguar pjesërisht në vlerë 13,333 euro dhe fatura në vlerë 8,790 euro ishte paguar pjesërisht në 8,220 euro.
Komuna e Podujevës, sipas Auditorit, kishte nënvlerësim për 44,950 euro. Gabimi ishte se faturat e rregullta ishin trajtuar si detyrim kontingjent.
Komunat me detyrimet më të larta janë ajo e Gjilanit 9,956,455€ apo 43.7% të gjithsej borxheve të nivelit lokal, pastaj Ferizaji 4,421,297€ apo 19.4%, si dhe Mitrovica Jugore me 1,120,411€ apo 4.9%.
“Shpalosjet e pasakta të detyrimeve paraqesin një pasqyrë jo të drejtë të pozitës financiare të OB-ve dhe mund të rezultojnë me vendime joadekuate gjatë procesit të buxhetimit”.