SHBA ka dëshmi se lufta kundër Ukrainës po del të jetë 'një fatkeqësi strategjike' për Rusinë
Po vazhdon lufta në Ukrainë edhe sot në ditën e 37-të.
Më 24 shkurt, Rusia ka dërguar dhjetëra mijëra trupa në Ukrainë me qëllim të degradimit të kapaciteteve ushtarake të Ukrainës dhe të çrrënjosjes së njerëzve që i ka quajtur nacionalistë të rrezikshëm.
Forcat ukrainase janë përgjigjur me rezistencë të ashpër ndaj luftës.
Perëndimi ka vendosur sanksione të pashembullta ndaj Rusisë, me qëllim që kjo e fundit të tërheqë forcat nga Ukraina.
Rusia e konsideron luftën në Ukrainë si “operacion special ushtarak dhe thotë se nuk do t’a ndalojë derisa të arrihen plotësisht objektivat e saja të përcaktuara për këtë “operacion”.
Ndërkohë në terren zhvillimet janë të shumta dhe ndryshojnë nga çasti në çast.
Katërmbëdhjetë ton ushqime dhe ilaçe u konfiskuan nga forcat ruse përgjatë një korridori humanitar të enjten.
Presidenti Putin nuk është forca që ka qenë”, thotë ministri britanik i mbrojtjes. “Ai tani është një njeri në një kafaz që e ka ndërtuar vetë”.
Udhëheqësi rus kërcënon se do ta ndalojë furnizimin me gaz për vendet “jomiqësore” nëse ato nuk e blejnë gazin me monedhën ruse nga e premtja.
Në një paraqitje të rrallë të mospajtimit të brendshëm, presidenti ukrainas Zelensky njofton se ka shkarkuar dy gjeneralë pasi ata ishin “tradhtarë”.
Presidenti Joe Biden ka njoftuar nxjerrjen e një sasie të paprecedentë prej 180 milionë fuçi nafte nga rezervat strategjike të SHBA.
Nëse po na bashkoheni tani, këto janë zhvillimet e fundit në dhe rreth luftës në Ukrainë:
Shtëpia e Bardhë ka deklaruar se është në posedim të dëshmi vese lufta kundër Ukrainës ka qenë “një fatkeqësi strategjike” për Rusinë. “Ne kemi parë dëshmi të pakontestueshme se kjo ka qenë një fatkeqësi strategjike për Rusinë”, tha drejtoresha e komunikimit Kate Bedingfield, duke shtuar se Rusia “po punon për t’i ripërcaktuar qëllimet fillestare të pushtimit të tyre”.
Presidenti i SHBA Joe Biden ka deklaruar se presidenti rus Vladimir Putin “duket se është i izoluar” dhe vuri në dukje se “ka disa indikacione se ai ka pushuar nga puna ose ka vënë në arrest shtëpie disa nga këshilltarët e tij”.
Iryna Vereshchuk, ministrja ukrainase e riintegrimit të territoreve të pushtuara përkohësisht, tha se disa autobusë evakuimi në rrugë për në Mariupol u mbajtën në një pikë kontrolli rus dhe 14 ton ndihma humanitare të destinuara për në Melitopol u konfiskuan nga trupat ruse të enjten.
Sekretari i Mbrojtjes i Mbretërisë së Bashkuar, Ben ëallace tha se Putini “nuk është forca që ishte dikur” dhe tani është “një njeri në ndërkohë që ushtria e tij është e rraskapitur dhe ai ka pësuar humbje të konsiderueshme. Ai jo vetëm që duhet të jetojë me pasojat e asaj që po i bën Ukrainës, por duhet të jetojë edhe me pasojat e asaj që i ka bërë ushtrisë së tij”.
Rusia ka kërcënuar se do t’i ndërpresë kontratat për furnizimin e Evropës me një të tretën e gazit të saj, nëse ato nuk paguhen në monedhën ruse. Putin nënshkroi një dekret të enjten duke thënë se blerësit e huaj duhet të paguajnë në rubla për gazin rus duke filluar nga e premtja. Ai tha se kontratat do të ndërpriteen në rast se këto pagesa nuk do të kryheen. Gjermania dhe Franca i hodhën poshtë kërkesat dhe thanë se ato përbënin “shantazh”.
Presidenti ukrainas Volodymyr Zelenskiy përsëriti paralajmërimin e tij se Rusia po përgatitet për “sulme të fuqishme” në rajonin e Donbasit pasi duket se do t’i tërhiqet nga një sulm ndaj Kievit. Pentagoni tha gjithashtu se Rusia mund t’i ripozicionojë disa nga forcat e saj për t’i dërguar ato në Donbas.
Shefi i NATO-s Jens Stoltenberg tha se forcat ruse nuk po tërhiqen, por po rigrupohen. Ai tha gjithashtu se aleanca duhet të bindet se Rusia po negocion me mirëbesim në bisedimet e paqes në Stamboll, sepse objektivi ushtarak i Moskës që nga fillimi i pushtimit të saj në Ukrainë nuk kishte ndryshuar.
Bisedimet e paqes midis Rusisë dhe Ukrainës do të rifillojnë online të premten në mëngjes.
Rusia po i ridislokon elementë të forcave të saj nga Gjeorgjia për ta përforcuar pushtimin e saj, tha të enjten inteligjenca ushtarake britanike. “Ka shumë pak gjasa që Rusia të ketë planifikuar të gjenerojë përforcime në këtë mënyrë dhe kjo është tregues i humbjeve të papritura që ka pësuar gjatë pushtimit”, shtoi ministria.
Një korridor humanitar do të hapet nga ora 10 e mëngjesit të së premtes për t’i lejuar civilët të dalin nga qyteti port i rrethuar i Mariupol, i cili ndodhet në Donbas në Ukrainën juglindore. Ky vendim vjen pas “një kërkesë personale nga presidenti francez dhe kancelari gjerman Scholz drejtuar presidentit rus Vladimir Putin”, thuhet në deklaratë.
Një kolonë autobusësh ukrainas është nisur për në Mariupol në përpjekje për të dërguar furnizime humanitare dhe për t’i nxjerrë civilët e bllokuar atje, ka deklaruar zëvendëskryeministri i Ukrainës.
Udhëheqësit e BE-së dhe Kinës do të takohen për një samit të parë pas dy vjetësh të premten, me Brukselin të prirur për garanci nga Pekini se nuk do ta furnizojë Rusinë me armë dhe as nuk do ta ndihmojë Moskën t’i anashkalojë sanksionet perëndimore. Zyrtarët e BE-së të afërt me përgatitjet e samitit në fjalë thanë se çdo ndihmë e dhënë për Rusinë do ta dëmtonte reputacionin ndërkombëtar të Kinës dhe do t’i rrezikonte marrëdhëniet me partnerët e saj më të mëdhenj tregtarë – Evropën dhe Shtetet e Bashkuara.
Forcat ruse raportohet se janë larguar nga termocentrali i Çernobilit, tha Ministria e Energjisë Atomike e Ukrainës. Trupat ruse filluan të largoheshin nga atje pasi ushtarët morën “doza të konsiderueshme” rrezatimi nga gërmimi i llogoreve në vendin shumë të kontaminuar, tha kompania shtetërore e energjisë e Ukrainës. Energoatom tha se rusët kishin gërmuar në pyllin brenda zonës së përjashtimit rreth fabrikës tashmë të mbyllur dhe “pati panik pas shfaqjes së simptomave të para të sëmundjes”, e cila “u shfaq shumë shpejt”. Energoatom më vonë tha se forcat ruse kishin marrë ushtarë ukrainas si pengje kur ata u larguan.
Administrata Biden e ka miratuar tërheqjen dhe shitjen e 30 milion fuçi nafte nga Rezerva Strategjike e Naftës (SPR) duke dhënë si shkas një ndërprerje të konsiderueshme të furnizimit me energji për shkak të luftës në Ukrainë./ The Guardian
Përgatiti: Nuhi Shala
