Rritja e çmimit të bukës në BE deri në masën prej 65% - në Kosovë mesatarja e çmimit, 50 centë

Çmimet e bukës janë rritur ndjeshëm në të gjithë Evropën gjatë vitit të kaluar, tregojnë të dhënat e reja, ndërkohë që rritja më emadhe është bërë që nga pushtimi i Ukrainës nga Rusia.

Rritja ishte mesatarisht 18% më e lartë në gusht se një vit më parë, sipas Eurostat, agjencia statistikore e BE-së.

Në gusht të vitit të kaluar, rritja mesatare e çmimeve të bukës në BE ishte vetëm 3%.

Eurostat thotë se çmimet e bukës janë në nivelin më të lartë.

Hungaria është goditur më së keqi nga kjo rritje prej 65.5% gjatë vitit, ndërsa Franca, e famshme për baguettes e saj, ka pasur rritjen më të ngadaltë të çmimeve.

Pushtimi i Rusisë dhe bllokimi i eksporteve të grurit nga Ukraina, e cila ishte eksportuesi i pestë më i madh në botë i grurit, kanë shkaktuar rritje të çmimeve.

Buka nuk është i vetmi produkt që ka shënuar rritje të ndjeshme të çmimit. Çmimet e kombinuara të bukës dhe drithërave janë rritur me 16.6% në Eurozonë, rritja më e lartë që nga janari i vitit 1997.

Ndoshta, befasisht, rritja e kostos së çmimeve të ushqimeve dhe energjisë ka kontribuar gjithashtu në rritjen e inflacionit, së bashku me rritjen e çmimeve të energjisë. Në Bashkimin Evropian, inflacioni ka shënuar një rekord të lartë në muajin gusht, duke arritur në 9.1 për qind. Si kornizë referimi, qëllimi dhe misioni i Bankës Qendrore Evropiane është ta mbajë inflacionin “afër por nën” 2%.

Ushqimet dhe pijet patën rritjen e dytë më të madhe, me 12.4%, pas banimit dhe energjisë elektrike, të cilat pësuan një rritje prej 19.7%.

Çfarë ndikimi ka kjo rritje e çmimit tek njerëzit?

Familjet evropiane po e ndjejnë ngulfatjen e këtyre rritjeve të çmimeve. Sipas të dhënave nga Federata e Bukëpjekësve, shoqata tregtare që përfaqëson industrinë e Bukës dhe Bukës në Mbretërinë e Bashkuar, shumica e vendeve në BE kanë një konsum mesatar prej 50 kg bukë për person në vit.

Por ndërkohë që është e vështirë të gjesh një zëvendësim për bukën dhe produktet e tjera të grurit, shtyllat e dietës së miliona evropianëve, rritja e çmimeve tashmë ka një ndikim.

Në Itali, ku çmimi mesatar i bukës është rritur me 13.5 për qind nga gushti i vitit 2021 deri në gusht të vitit 2022 dhe sindikatat e furrtarëve kanë paralajmëruar se mund të rritet ende në 6 euro për kilogram në të ardhmen e afërt, të dhënat tregojnë se në shtatë muajt e parë nga viti 2022 konsumatorët i reduktuan blerjet e tyre ushqimore me 3.2%. Por për shkak të inflacionit, familjet ende po shpenzojnë më shumë për produkte ushqimore sesa më parë.

Sipas të dhënave nga Komisioni Evropian, rritja e inflacionit midis janarit 2021 dhe qershorit 2022 e ka rritur koston e konsumit për frymë banori të familjeve mesatarisht me rreth 160 euro në muaj.

Ndërkohë që çmimet e ushqimeve vazhdojnë të rriten, Brukseli shqetësohet se familjet me të ardhura më të ulëta do të vuajnë më shumë, pasi do t’u duhet të shpenzojnë një pjesë më të madhe të buxheteve të tyre për artikujt bazë si buka.

Çmimi i bukës në Kosovë

Në Kosovë, çmimi i bukës sillet nga 45 centë deri në 60 centë, varësisht nga furra që e prodhon dhe qyteti.

Deri në fillim të vitit, çmimi ka qenë 35 centë. Në atë kohë ka pësuar rritje vende-vende deri në 50 centë.

Por, muaj më parë, në disa furra të Gjilanit – qytet në lindje të Kosovës – çmimi i një buke që peshon mbi 500 gramë, është rritur nga 50 në 60 centë.

Kosova është përballur me rritje çmimesh të produkteve dhe shërbimeve nga fundi i vitit të kaluar, kryesisht për shkak të çrregullimeve në furnizime që ka shkaktuar pandemia e koronavirusit.

Hov më të madh atyre u ka dhënë pushtimi rus i Ukrainës, i cili ka nisur në fund të shkurtit.

Si Rusia, ashtu edhe Ukraina janë ndër eksportueset më të mëdha të drithërave në botë dhe lufta mes tyre ka shkaktuar çrregullime në tregje.

Sipas Agjencisë së Statistikave të Kosovës, norma e inflacionit në muajin Gusht të këtij viti ka arritur në 13 për qind, nga 0.2 për qind sa ka qenë në periudhën e njëjtë të vitit të kaluar.

Kosova importon sasi të madhe të miellit. Në vitin 2021, vendi ka importuar miell në vlerë prej 2.1 milionë eurosh, ndërsa ka eksportuar sasi në vlerë prej 89 mijë eurosh.

Vitin e kaluar, sasia e grurit të importuar ka arritur vlerën e rreth 11 milionë eurove, ndërsa janë eksportuar sasi prej rreth dy milionë eurosh./Euronews, Kallxo.com