Foto: Urim Krasniqi/KALLXO.com
KQZ vazhdon përgatitjet për organizimin e zgjedhjeve në veri, kontraktohen mijëra euro shërbime
Institucioni për organizimin e zgjedhjeve në vend, KQZ, po vazhdon përgadtijet për organizmin e zgjedhjeve të jashtëzakonshme në katër komunat veriore të Kosovës.
Për realizimin e këtyre zgjedhjeve, KQZ deri më tash ka kontraktuar mijëra euro për t`u furnizuar me materiale zgjedhore dhe materiale tjera. Në anën tjetër gjendja në veri vazhdon të mbetet e tensionuar.
Formular zgjedhor e doracak trajnimi
Nëpërmjet tenderit të negociuar me vlerë të parashikuar për kontratë 6,300 euro për t`u furnizuar me materiale në mes tjerash si: 130 copë formularë të përputhjes së të dhënave dhe rezultateve FPR në formatin A3 për Kryetar Komune dhe 100 tjera për kuvende komunale, fllik A3 fletë llogaritëse për kandidatin, zarfi i fletëvotimeve me kusht, shenja për ndalimin e armëve, pirjes së duhanit, thasë të ndryshëm dhe materiale tjera sipas kërkesave dhe sasisë së përcaktuar në përshkrimin e çmimeve.
Për realizimin e këtij furnizimi, kontrata nga KQZ iu është dhënë kompanisë “Dukagjini” ShPK me vlerë 6,291.75 euro.
Ndërsa në tenderin e vlerës minimale, për shtypjen e 60 doracakëve për trajnime në gjuhën serbe, 150 në gjuhën shqipe, 30 në gjuhën angleze dhe 20 tjera gjuhën turke ju është besuar kontrata në vlerë 900 euro kompanisë G.I.Grafo – Loni SH.P.K.
Mbi 2,200 euro për bateri për UV llampa
Në vlerë 2,205 euro, nëpërmjet procedurës së negociuar të tenderit të përdorur për këtë lloj furnizimi, KQZ ka kontraktuar për blerjen e 1800 copë baterive 1.5 V AA për UV llamp për rundi parë dhe 1,200 sosh për raundin e dytë.
Kontrata është nënshkruar me kompaninë “ALBUS” Sh.P.K e cila fillimisht kishte ofertuar me 2,250 euro vlerë të përgjithshme të kontratës, mirëpo ofroi zbritje.
“Pas negocimit OE ka ofruar zbritje prej 2 % të çmimit për njësi, ku çmimi total i zbritur është 2,205.00 Euro”-thuhet në njoftim.
Vula për vulosjen e fletëvotimeve
KQZ pritet të furnizohet me vula, dhe jastëk me ngjyrë për vulosjen e fletëvotimeve, për blerjen e tyre kishte ndarë 1,800 euro ndërsa pas negociatave sipas procedurës së përdorur në këtë tender, me kompaninë ” ZERO – KS ” SHPK, vlera e përgjithshme e kontratë është 1,435.20 euro.
Nëpërmjet kësaj kontrate, pritet të blihen 40 copë vula dhe po aq jastëk për vula, si dhe 40 copë ngjyrë për vula.
Fletëvotime
Komisioni Qendror i Zgjedhjeve (KQZ), nëpërmjet platformës elektronike për prokurim publik në Kosovë “e-prokurimi” ka nënshkruar kontratë për shtypjen, paketimin dhe transportin e fletëvotimeve për zgjedhjet e jashtëzakonshme për Kryetar të komunave Mitrovicë e Veriut, Zubin Potok, Leposaviq dhe Zveçan 18 dhjetor 2022” dhe zgjedhjet e parakohshme për kuvendet e Komunave Zveçan dhe Leposaviq 25 dhjetor 2022.
Nëpërmjet procedurës së negociuar me kriter për dhënie të kontratës, çmimi më i ulët, kontrata në fjalë dhe me kohëzgjatje tre muaj, ju është dhënë kompanisë “Dukagjini” ShPK. në vlerë të ofertuar 11,712.50 euro.
Në të dhënat shtesë të autoritetit thuhet se çmimi u ulë pas negociatave.
“Ka ofertuar me çmimin 11,712.50 €;dhe pas negocimit me OE ka ofruar çmim me te lire rreth 2% ose 237,50€. Çmimi total pas negociatave është 11,475.00 €”- thuhet në njoftim.
Incidente e tensione në veri
Ndryshe siç raportoi KALLXO.com, dhe sipas Policisë, në orët e para të pasdites së datës 6 dhjetor 2022, në disa zona të Zubin Potok-ut dhe Mitrovicës së Veriut janë regjistruar disa incidente dhe dyshohet për shkrepje armësh e shpërthime.
Policia ka njoftuar se deri më tani nuk janë raportuar lëndime nga këto incidente, ndërsa raportohet se protestuesit kanë demoluar zyrat e Komisionit Komunal Zgjedhor.
KALLXO.com ka mësuar se KQZ ka kërkuar tash e disa ditë që gjatë kësaj kohe kur pritej të vendoseshin zyrtarët e lartë komunal që janë përzgjedhur për të zëvendësuar ata të dorëhequrit, të kenë edhe mbështetjen e Policisë së Kosovës.
Tutje sipas KALLXO.com, në momentet kur është tentuar zëvendësimi i zyrtarëve të lartë, është lëshuar edhe alarmi në pjesën veriore të Kosovës.
Shpërthime janë dëgjuar edhe gjatë transmetimit të drejtpërdrejtë të KALLXO.com për ngjarjet në veri.
Në mbrëmjet e datës 8 dhjetor, një patrullë e Policisë së Kosovës është sulmuar në Zveçan me armë zjarri ku u plagos një polic.
Në veri, është sulmuar edhe ekipi i KALLXO.com. Makina me të cilën po udhëtonin ekipi i KALLXO.com, producenti Valdet Salihu dhe gazetarja Shkodrane Dakaj janë sulmuar nga persona të maskuar në afërsi të Shkollës teknike në Mitrovicën e Veriut.
Për sulmin ndaj Policisë së Kosovës dhe të gazetarëve të KALLXO.com ka reaguar edhe presidentja e vendit, Vjosa Osmani
“Plagosja e mbrëmshme e një pjesëtari të Policisë së Kosovës është veprim kriminal dhe i orientuar kundër rendit kushtetues e sovranitetit të Kosovës si dhe kundër veprimeve për sundim të rendit e ligjit. Gjithashtu, sulmet ndaj gazetarëve përbëjnë cenim flagrant të të drejtës për informim të lirë.” – u shpreh ajo.
Reagimet
Për organizmiin e zgjedhjeve në veri, Ambasadori i Shteteve të Bashkuara të Amerikës në Kosovë, Jeff Hovenier, ka thënë se nuk janë krijuar kushtet e duhura për momentin që të mbahen zgjedhjet e jashtëzakonshme në katër komunat me shumicë serbe në veri të Kosovës, të cilat ishin planifikuar të mbahen me 18 dhjetor.
Sipas ambasadorit Hovenier, siguria e të gjithë qytetarëve të Kosovës duhet të jetë prioriteti më i lartë.
“Shtetet e Bashkuara janë të shqetësuara se nuk janë krijuar kushtet për momentin që zgjedhjet të mbahen në fund të këtij muaji në veri të Kosovës. Siguria e të gjithë qytetarëve të Kosovës duhet të jetë prioriteti më i lartë. Ne kërkojmë që të gjithë të përfshirët të vetëpërmbahen” – ka shkruar Hovenier në Twitter.
Në anën tjetër, kreu i punëve të brendshme në Qeverinë e Kosovës, Xhelaj Sveçla nga Mitrovica e Jugut ka folur për situatën në veri duke thënë se Kosova ka kapacitetet e duhura për të mbajtur dhe ofruar siguri për zgjedhjet e jashtëzakonshme në katër komunat veriore.
“Ka shumë punë në këtë qytet, shumë punë në këtë zonë, prandaj edhe kam ardhur, me i kordinu punët. Situata është qetë. Ne kemi edhe kapacitete me i mbajt zgjedhjet dhe me i siguru zgjedhjet. Policia e Kosovës bën plane të saj dhe në bazë të vlerësimit, ne i shtojmë kapacitetet”- tha Sveçla në një bisedim me gazetarët në afërsi të “Urës së Ibrit” në Mitrovicë të Jugut.
Ai ka folur edhe për deklaratën e ambasadorit amerikan në Kosovë, Jeff Hovenier, i cili tha sot se nuk ka kushte për mbajtjen e zgjedhjeve në veri.
Sveçla ka thënë se lidhur më këtë institucionet përkatëse e vlerësojnë situatën.
“Ai e ka dhënë një opinion, ne e vlerësojmë shumë por janë institucionet përkatëse ato që vlerësojnë” – citohet të ketë thënë Sveçla.
Sulmet ndaj zyrave të KQZ-së në veri, misioni i OSBE-së në Kosovë ka dënuar “ashpër aktet e dhunës dhe frikësimit”
Sipas OSBE-së, KQZ-ja ka treguar se ka aftësi teknike për të zhvilluar zgjedhje që plotësojnë standardet ndërkombëtare.
“Zgjedhjet e suksesshme kërkojnë pjesëmarrje të gjerë dhe besim publik në mënyrë që të japin një rezultat të besueshëm të pranuar nga të gjithë. KQZ-ja ka treguar se ka aftësi teknike për të zhvilluar zgjedhje që plotësojnë standardet ndërkombëtare. Duke vepruar kështu, KQZ-ja mbështetet në përkrahjen e institucioneve të tjera të Kosovës për të vendosur të gjitha elementet e nevojshme, duke përfshirë vlerësimet e sigurisë për procesin zgjedhor dhe një mjedis të sigurt për të gjithë ata që janë të përfshirë në terren” – thuhej në komunikatën e misionit të OSBE-së në Kosovë.
Së fundmi ka reaguar edhe ambasadori i Gjermanisë në Kosovë, Jorn Rohde, i cili ka thënë që zgjedhjet në veri duhet të shtyhen sepse situata nuk është e favorshme.
Rohde bëri të ditur që pajtohet me ambasadorin amerikan në Kosovë, Jeff Hovenier, që zgjedhjet duhet të shtyhen pasi siguria duhet të jetë primare për popullin e Kosovës.
“Jam dakord me kolegun tim amerikan që zgjedhjet duhet të shtyhen. Është e qartë se situata aktuale nuk është e favorshme për mbajtjen e tyre tani”- ka shkruar Rohde në Twitter.