Ish- zëvendësministri i PDK-së bëhet shef i hetimeve në ATK

Ish zëvendësministri i PDK-së në Ministrinë e Tregtisë dhe Industrisë, Bekim Jupa, është rikthyer në Administratën Tatimore të Kosovës.

Bekim Jupa, që është edhe anëtar i Këshillit Drejtues të Partisë Demokratike të Kosovës, është emëruar shef i Hetimeve në Administratën Tatimore të Kosovës.

Jupa e kishte pezulluar punën në ATK me rastin e emërimit si zëvendësministër i Tregtisë dhe Industrisë.

Jupa ka qenë aktiv për një kohë të gjatë në politikë.

Ai kishte kandiduar nga PDK-ja për asamblist të Komunës së Gjakovës.

Profili i tij në “Facebook” është i mbushur me fotografi me krerët e Partisë Demokratike të Kosovës, të nivelit qendror dhe lokal.

Jupa, përveç fushatës për PDK-në është marrë edhe me partitë që aktualisht janë në pushtet – LVV dhe LDK-në, duke i thumbuar ato gjatë kohës sa negocionin për formimin e Qeverisë.

Lajmin se zëvendësministri i PDK-së i njëjti është emëruar në këtë pozitë e ka konfirmuar për KALLXO.com drejtori i përgjithshëm I ATK-së, Ilir Murtezaj.

Murtezaj ka thënë për KALLXO.com se duke e pasur parasysh se zv.ministri Jupa i është kthyer punës në ATK, është dashur që ta emërojë në një pozitë të barasvlershme me pozitën që e ka mbajtur para se të largohej nga ATK-ja.

“Zv.ministri Jupa është kthyer në punë në ATK. Ai nuk është graduar por është në pozitën e njëjte të cilën e ka pasë kur e ka pezullu detyrën. Ai ka qenë udhëheqës i Divizionit të mbledhjes së detyrueshme dhe pasi ajo pozitë është shuar është obligim i punëdhënësit që ta emërojë në një pozitë ekuivalente”, tha drejtori i ATK.

Ky emërim është në kundërshtim me nismën e Murtezajt për depolitizimin e Administratës Tatimore të Kosovës.

Në shtator të vitit 2019, drejtori Murtezaj kishte ndërmarrë një nismë për depolitizimin e ATK-së. Ai kishte kërkuar nga të gjithë të punësuarit që të zgjidhnin në mes të politikës dhe punës në ATK.

Depolitizimin e ATK-së Murtezaj e kishte theksuar në mesin e sukseseve të tij prej emërimit në krye të Administratës Tatimore.

Anëtari i PDK-së është vendosur në njërin nga rolet më të rëndësishme në Administratën Tatimore të Kosovës.

Njësiti i hetimeve është njësit i cili bashkëpunon ngushtë më prokurorinë e shtetit dhe me hetuesit e krimeve ekonomike. Si njësit hetimor ka të drejtë të hapë kontrolle kundër bizneseve të ndryshme në Kosovë për të cilat ka bazë për hetim.

Jupa e zëvendëson Safet Krasniqin, i cili ishte suspenduar nga pozita e shefit të hetimeve pas ngritjes së aktakuzës nga Prokuroria Speciale për vepra korruptive.

Safet Krasniqi po akuzohet nga Prokuroria Speciale e Kosovës se gjatë kohës sa ishte ushtrues detyre i pozitës së drejtorit të Hetimeve në ATK nuk kishte ndërmarrë asnjë aktivitet kontrolli apo vizitë duke e dëmtuar kështu qëllimisht buxhetin e Kosovës.

Sipas aktakuzës, Safet Krasniqi i kishte autorizuar disa zyrtarë të ATK-së për të vizituar disa biznese dhe për t’ua korrigjuar deklarimet tatimore, ndonëse për to kishte deklarime se punonin me fatura të dyshimta.

Do NOT follow this link or you will be banned from the site!