Deputeti i PDK-së: Liderët e dinin për deportimin e 'gylenistëve'
Deputeti i PDK-së, njëherësh ish-anëtari i Komisionit hetimor për ‘gylenistët’, Hajdar Beqa, ka thënën që të gjitha institucionet kanë qenë të informuara për deportimin e gjashtë shtetasve turq.
“Unë nuk mund të them që nuk kanë qenë në dijeni, por nuk mund të flas mbi materialet, sepse nuk mund të ndodhë një veprim i tillë pa pasur informata. Të gjitha institucionet në një formë apo tjetrën kanë qenë të informuara”, ka thënë ai.
Në një intervistë për KALLXO.com ai ka shtuar se nëse ka qenë e informuar ministria e Punëve të Brendshme atëherë do të duhej të ishte edhe kryeministri.
“Por kryeministri pikërisht për këtë nëse ajo hallka zingjirore e hierarkisë nuk është respektuar atëherë ka marrë veprime dhe edhe ministri i brendshëm është shkarkuar për shkak të mos informimit”, ka thënë tutje ai.
Beqa fajin për dështimin e komisionit ia hedhë kryetarit të Komisionit Xhelal Sveçla si dhe nënkryetarit, Driton Selmanaj, sepse sipas tij ata nuk kanë arritur brenda planit dinamik ti administrojnë të gjitha provat që i kanë pasur.
Tutje në këtë intervistë ai ka thënë që organet e hetuesisë duhet të merren me personat që e kanë publikuar provat.
“Prokuroria duhet të merret edhe me anëtarët e komisionit që e kanë keqpërdorur detyrën dhe i kanë publikuar provat pa qenë prova zyrtare, këto janë materiale të një individi i cili nuk ka pasur të drejtë, edhe eksperti duhet të jap përgjegjësi për publikim nëse e ka publikuar ai”, tha Beqa.
KALLXO.com: Z. Beqa, si i keni parë reagimet ndërkombëtare rreth punës së Komisionit hetimor për deportimin e 6 shtetasve turq para një viti?
Hajdar Beqa: Unë nuk kam parë ndonjë risi, kemi pasur edhe deklarime të institucioneve tona, të ngjashme me këto që ishin të ambasadave. Ne reagimet i kemi parë shumë të arsyeshme, edhe ne si anëtarë por edhe si deputet i Kuvendit të Republikës së Kosovës na intereson që sa më shpejtë kjo çështje të zbardhet nga institucionit gjegjëse. Siç jeni të informuar lënda është edhe në organet e prokurorisë dhe drejtësisë dhe besoj që çdo interferim i joni mund të dëmtoj hetimet dhe jam optimist se kjo çështje duhet të zbardhet.
Nuk duhet të bëjmë shumë politikë, apo ta përdorim për marketing ndaj ndonjë subjekti politik apo diçka tjetër, një rast që konsideroj që nuk ka ndodhur i mirë në vendin tonë, por duhet të ja lëmë drejtësisë që ta kryej punë e vet. Nëse ka pasur mangësi ligjore dhe institucionet e kanë respektuar ligjin atëherë duhet ti shikojmë çka duhet të ndryshojmë në ligj që të mos na ndodhin raste të ngjashme në vendin tonë.
KALLXO.com: A ju shqetësojnë gjitha ato reagime?
Hajdar Beqa: Realisht, na ka shqetësuar kur ka ndodhur rasti, kur ka ndodhur rasti nuk ka pasur ndonjë arsyetim të fortë dhe ka pasur një opinion të publikut që u bë një imazh jo i mirë, një veprim jo i mirë për vendin. Por megjithatë ne duhet të jemi ithtarë të asaj se secili institucion duhet ti zbatoj rregullat edhe ligjet që i kemi në funksion në legjislacionin e vendit.
Dështimin e Komisionit i’a atribuoj atyre që e kanë udhëhequr komisionin
KALLXO.com: Reagimi i Ambasadës Amerikane thotë se ka pasur shmangie të qartë të proceseve ligjore të Kosovës nga ana e politikanëve të Kosovës. Ndërkohë Komisioni ka dështuar t’i adresojë këto shmangie deri në fund për shkak të, siç janë shprehur anëtarët e Komisionit nga opozita, bllokadave që u janë bërë gjatë punës? A ndjeni përgjegjësi që Komisioni nuk ka mundur ta çojë punën deri në fund?
Hajdar Beqa: Komisioni duhet të ketë një përgjegjësi që nuk ka mundur ta përfundoj punën, ne e kemi pasur një plan dinamik, komisioni ka 11-të anëtarë dhe është udhëhequr nga dy deputet të opozitës, kryetari z. Sveçla dhe nënkryetari z. Selmanaj, kanë qenë nga opozita, në asnjë mënyrë nuk kemi pasur pengesë në komision. Unë dështimin e Komisionit i’a atribuoj atyre që e kanë udhëhequr komisionin sepse ne kemi pasur një plan dinamik dhe është dashur ta realizojmë planin, kurse ata nuk kanë arritur brenda planit dinamik ti administrojnë të gjitha provat që i kemi pasur, nuk kemi arritur të kemi një raport dhe është e drejtë e atyre që pretendojnë që komisioni ka dështuar, sepse mandati i komisionit ka qenë në harmonizim me ligjin parlamentar, ne realisht nuk kemi arritur në fund ta prodhojmë një dokument dhe t’ia propozojmë organit i cili ka na emëruar. Unë kam dëgjuar zëra nga deputetët e opozitës që kemi pasur pengesa prej atij ose prej tij, duke mbuluar dështimin e menaxhimit të tyre mundohen të hedhin fajin, por realisht faji është i atyre që e kanë udhëhequr.
Komisioni ka pasur 11 anëtarë, PDK-ja ka pasur dy anëtarë, komisioni mbledhjet i mbanë me gjashtë anëtarë realisht edhe me pas dashtë dikush prej neve mos me qenë aktiv komisioni ka pasur numrat e mjaftueshëm për me vazhdu punën. Shpesh nuk janë thirrur mbledhjet në kohën e duhur, shpesh ka ndodhur kur ne kemi pasur seancë është mbajtur komisioni hetimor dhe është mbajtur në kundërshtim me ligjin për hetim parlamentar respektivisht me nenin 12 ku thuhet qartë që në moment kur kryesuesi e sheh që nuk ka kuorum duhet ta ndërpret mbledhjen deri të sigurohet kuorumi dhe nuk mundet me pas kuorum kur mbahet seanca me u mbajte edhe komisioni sepse primare për ne si deputet kur mbahet seanca atë ditë zyrtarisht nuk duhet të ketë komisione.
KALLXO.com: Z. Beqa, ju si PDK a keni qenë të rregullt në mbledhjet që i ka pasur komisioni?
Hajdar Beqa: Përveç kur kemi pasur seanca kemi qenë të rregullt. Në seanca edhe 100 komisione me ndodhë kur ka seanca obligim e kemi seancën. Seanca nuk kemi çdo ditë në orar të njëjtë, shembull në ora 10 seanca në 10 komisioni atëherë nuk ka mundësi, kemi pasur raste jo çdo herë. Unë edhe në seanca edhe në komisione jam deputet i rregullt.
KALLXO.com: A duhet të zgjatet në kohë mandati i këtij komisioni pas këtyre reagimeve ndërkombëtare?
Hajdar Beqa: Realisht unë mendoj që duhet të zbardhet çështja, duhet organet përkatëse ta kryejnë punën më shpejtë, kurse komisioni ne kemi kërkuar që me na u zgjatë një mandat prej 30 ditës por fatkeqësisht nuk e kemi menaxhuar mirë kërkesën dhe e kemi bërë pasi ka përfunduar mandati i komisionit dhe sipas ligjit parlamentar kur udhëheqja e sheh se nuk po mundet brenda afatit me kry punën e vet atëherë kërkon brenda afatit me ju zgjatë mandati. Ne e kemi humbur hapin këtu në kuptimin e rregullores sepse pasi që ka përfunduar mandati kemi kërkuar që të na zgjatet afati por është e drejtë e secilit grup parlamentar që me kërkuar zgjatje të mandatit ose një komision i ri për me vazhdu punën aty ku e kemi lënë.
Ne nuk kemi arritur me bo një raport as të pranueshëm as të papranueshëm, ne e kemi kyqur një ekspert, eksperti pretendon që janë 31 shkelje, ka mundësi me pas 51 shkelje mundet me u kon asnjë shkelje, unë nuk e thash rastësisht se ne kur i kemi dëgjuar familjarët dhe kur i kemi dëgjuar institucionet gjegjëse të gjitha janë zotuar që kemi vepruar sipas ligjit dhe na kanë argumentuar që kanë vepruar sipas ligjit.
Por për opinioni publik ky hap nuk është i hijshëm ne duhet ti shikojmë edhe konventat ndërkombëtare të të drejtave të njeriut që a janë shkelur dhe në vendin tonë si shtet i ri si demokraci e re nuk duhet të lejomë një gjë të tillë dhe duhet të dënohen rastet nëse janë shkelur të drejtat e njeriut.
Vullneti im dhe i partisë sime është që kjo çështje të zbardhet sa më shpejtë
KALLXO.com: Në raportin e ekspertit amerikan Tienmu Ma janë publikuar hiq më pak se 31 shkelje, sa është shqetësuese kjo?
Hajdar Beqa: Eksperti është emëruar, komisioni ka ngarkuar një ekspert, realisht kur e kemi ngarkuar ekspertin ka pasur zëra se a kemi të drejtë të me angazhu një ekspert të jashtëm kur nuk është shtetas i Kosovës pa e bë verifikim e tij sepse aty ka pasur prova konfidenciale me institucionet që ofrojnë materiale konfidenciale.
Megjithatë ne e kemi afruar ekspertin i cili ka pru një mendim që duhet të shqyrtohet në komision dhe secili anëtarë i komisionit ka një ekspertize të tillë dhe duhet ti ballafaqojmë faktet në mënyrë që të kemi një raport përfundimtar.
Nuk mund të lëshohemi në një dokument të një anëtari, ne realisht nuk kemi dokument zyrtar dhe çdo interpretim ndryshe apo secili prej neve si ish-anëtarë i komisionit që pretendojmë që ka raport apo pretendojmë që atë material ta qesim jashtë komisionit atëherë ne jemi duke e shkelur ligjin. Nuk jam ithtarë i asaj që duke shkelur ligjin të shikojmë se a ka shkelur dikush tjetër ligjin. Ne jemi deputet të Kuvendit të Republikës së Kosovës dhe duhet të punojmë në harmonizim të plotë me ligjet që i kemi në këtë rast.
Edhe gjatë mbledhjeve të komisionit, kur them dështimi është te menaxhmenti shpesh ka ndodhur që mbledhja ka vazhduar edhe pa kuorum dhe nuk konsiderohet si provë ajo. Megjithatë vullneti im dhe i partisë sime është që kjo çështje të zbardhet sa më shpejtë dhe kur është bërë komisioni hetimor PDK-ja e ka mbështetur dhe e mbështet prapë, ne i kemi pa edhe deklarimet e kryetari Veseli si kryetar i partisë apo edhe i parlamentit.
KALLXO.com: Si i komentoni deklaratat e Rrahman Sylejmanit dhe zyrtarëve të tjerë të cilët thonë se AKI ‘pushtoi’ zyrat e policisë për të zhvilluar operacionin?
Unë nuk i komentoj këto se nuk i kam parë këto deklarata realisht.
KALLXO.com: Janë brenda raportit të ekspertit amerikan…
Hajdar Beqa: Organet e hetuesisë duhet të merren edhe me rastin se kush ka bërë shkelje gjatë dëbimit por në të njëjtën kohë jam shumë optimistë prokuroria duhet të merret edhe me anëtarët e komisionit që e kanë keqpërdorur detyrën dhe i kanë publikuar provat pa qenë prova zyrtare, këto janë materiale të një individi i cili nuk ka pasur të drejtë, edhe eksperti duhet të jap përgjegjësi për publikim nëse e ka publikuar ai.
Nëse e ka publikuar njëri nga anëtaret duhet ta japim ne përgjegjësi sepse ne nuk na ka mandatuar Prokuroria e as ambasada, na ka mandatuar Kuvendi i Republikës së Kosovës dhe detyrë e jonë është ta bëjmë një raport dhe t’ia dorëzojmë Kuvendit sepse ai është organi i cili do ta debatoj një çështje të tillë dhe do ta merr një vendim, ka mundur ta hedhë poshtë e me e aprovu, ka mujt prokuroria në çdo kohë me e marrë dokumentin.
KALLXO.com: A po e kontestoni raportin e ekspertit amerikan?
Hajdar Beqa: Po s’kemi raport ai nuk është mandatuar prej komisionit me bo raport, ai ka bërë një ekspertizë të cilën kemi pasur me shqyrtu. Unë jam institucional nuk mund të dal jashtë mandatit që ma ka dhënë parlamenti, në moment që ne vazhdojmë punën atëherë në mbledhje të Komisionit ne do të pranojmë ose mospranojmë pretendimet e ekspertit. Ato janë pretendime, kemi anëtarë që ka më shumë pretendime, kemi anëtarë që nuk ka pretendime dhe duhet të ballafaqojmë faktet.
Unë në bazë të krejt kësaj kam parë se ka vakum ligjorë dhe duhet të plotësohen ligjet përkatëse që të mos ndodhin veprime të tilla. Sepse nëse një zyrtarë e merr një urdhër në harmonizim me ligjin e venit dhe nuk e zbaton është përgjegjësi penale, edhe moszbatimi i urdhrit është vepër penale, zbatimi është obligim nëse është ligji i tillë atëherë ata kanë pasur obligim ta bëjnë një gjë të tillë. Por ne sot nuk mund të flasim pa pasur atë dokumentin final sepse kemi shumë pretendime, unë thash që eksperti pretendon 31 shkelje mundet me pas më shumë ose më pak shkelje. Janë vetëm pretendime, eksperti e ka kryer punën e vet kur ja ka dorëzuar dokumentin komisionit, komisioni e kryen punën e vet kur ja dërgon kryesisë së Kuvendit për seancë, dhe kjo ka qenë mandati i komisionit. Nuk ka qenë mandati i jonë me bo marketing me fatkeqësitë që i kanë ndodhur dikujt.
KALLXO.com Z.Beqa në bazë të të gjithë punës suaj, a keni arritur të konfirmoni se prej kujt ka ardhur urdhri për depërtimin e gjashtë shtetasve turq?
Hajdar Beqa: Në bazë të ligjeve që janë, legjislacionit në fuqi, AKI-ja në këtë rast kur konstaton që një person është i rrezikshëm për sigurinë e vendit ai merr vendim e ka me ligj dhe urdhri ka qenë përmes agjencisë dhe institucionet e tjera kanë pasur vetëm me zbatu. Ne kemi marrë në pyetje edhe polic që kanë qenë vetëm operativ nuk kanë pasur ata përgjegjësi me urdhrin më të lartë. Unë nuk kisha thënë që njëherë të lëshohemi në prova në këtë fazë, sepse prokuroria është duke u marrë me argumentet dhe nuk kisha thonë që me u interferu në dëmtimin e provave, nëse jemi të interesuar me zbardhë rastin ne duhet të mos bëjmë shumë marketing politik por të bëjmë thirrje që në momentet më të shpejta të mundshme institucionet e drejtësisë ta bëjnë punë e vet. Mendoj që ka qenë mirë që komisioni të ketë të paktën edhe dy ose tri mbledhje për ta përfunduar punën dhe me e pas raportin final.
KALLXO.com: E tash që nuk e ka mundësinë për me pas raportin final…?
Hajdar Beqa: Atëherë na nuk kemi të drejtë me publiku dokumente, ai dokument mbet në Kuvend është pronësi e kuvendit deri në momentin që Kuvendi marr ndonjë veprim tjetër.
KALLXO.com: A duhet t’i vazhdohet mandati Komisionit?
Hajdar Beqa: Mendoj që seanca duhet me gjete një rrugë ligjore për me na jap një mundësi për rreth 30 dite me kry punën.
Komisioni ka ftuar presidentin ditëve kur ai ka qenë në vizita zyrtare
KALLXO.com: Cili ka qenë arsyetimi i presidentit për të mos ju përgjigjur 3 herë ftesës së komisionit?
Hajdar Beqa: Ne gati në të gjitha rastet që e kemi ftuar presidentin e kemi parë nëpër media që ka qenë jashtë vendit në agjendë shtetërore dhe ne si komision e kemi obligim që ta harmonizojmë agjendën me institucionet përkatëse si presidentin, kryeministrin, kryetarin e parlamentit, duhet të kuptojmë që ne kemi një agjendë. Shumë shpesh ka ndodhur që kemi thirrur presidentin kur e kemi ditur që presidenti nuk është në Kosovë dhe ne nuk mund të themi që presidenti nuk iu ka përgjigjur ftesës sepse ne e dimë që një agjendë e një burrështetasi të vendit tonë shembull ndodhë 6 muaj më herët, kurse agjenda e komisionit bëhet tri ditë më herët dhe këtu është dallimi.
KALLXO.com: A keni marrë ndonjë arsyetim zyrtar prej presidentit?
Hajdar Beqa: Prapë nuk edi duhet të pyesni kryetarin e komisionit. Por zyrtar nuk ka ma zyrtar se për krejt opinionin publik në ditën kur ne e ftojmë presidentin, dy ditë me herët është ditur që presidenti nuk është në Kosovës, dmth mediat e kanë deklaruar që presidenti ka një takim në X shtetin.
KALLXO.com: Si e komentoni faktin që Ish-shefi i AKI-së Driton Gashi menjëherë pas shkarkimit nga kjo pozitë u strehua në zyrën e presidentit Thaçi?
Hajdar Beqa: Nuk është strehuar, z. Gashi është zgjedhur sekretar i zyrës së presidentit, ka dallim strehimi edhe zgjedhja, në bazë të edhe kryeministrit Haradinaj që e kemi pasur në komision, ai ka të drejtë edhe të shkarkoj vartësit e tij në këtë raste te z. Gashi të kërkoj sepse janë kompetenca të ndërlidhura mes presidentit dhe kryeministrit, dhe kryeministri nuk e ka shkarkuar për asnjë konstatim të shkeljeve por e ka kërkuar lirimin e pozitës për shkak që nuk ka qenë i informuar kryeministri.
Unë mendoj që z. Gashi edhe nëse kishte nejtë në institucionin gjegjës deri kur kemi pasur një vendim nuk ka pasur diçka të keqe. Nëse atëherë ka pasur shkelje prej z. Gashi atëherë normal që edhe ai edhe secili njëri në këtë vend duhet të përgjigjet para ligjit, ligji duhet të jetë për të gjithë i njëjtë.
Deportimi i shtetasve turq i ka dhënë imazh negativ Kosovës
KALLXO.com: Cilat mendoni se kanë qenë përfitimet e Kosovës duke depërtuar këta shtetas të kërkuar nga presidenti turk Erdogan?
Hajdar Beqa: Unë nuk mendoj që kemi pasur përfitime ne pavarësisht a ka pasur shkelje ligjore apo jo në një formë apo tjetër ka ndikuar negativisht në imazhin e Kosovës negativisht depërtimi i tyre.
KALLXO.com: A mendoni që është e çuditshme që krerët e shteti nuk kanë qenë në dijeni?
Hajdar Beqa: Unë nuk mund të them që nuk kanë qenë në dijeni, por nuk mund të flas mbi materialet, sepse nuk mund të ndodhë një veprim i tillë pa pasur informata. Të gjitha institucionet në një formë apo tjetrën kanë qenë të informuara, nëse ka qenë e informuar ministria e Punëve të Brendshme atëherë duhet me qenë edhe kryeministri. Por kryeministri pikërisht për këtë nëse ajo hallka zingjirore e hierarkisë nuk është respektuar atëherë ka marrë veprime dhe edhe ministri i brendshëm është shkarkuar për shkak të mos informimit.
KALLXO.com: A keni qenë në dijeni ju si PDK me rastin e depërtimit të këtyre shtetasve?
Hajdar Beqa: Si parti jo, nuk mundimi me qenë të informuar si parti, janë institucionet ne jemi shtet dhe secili institucion i ka përgjegjësitë e veta dhe parti i ka punët e veta, kurse janë institucionet që duhet të jenë të informuara.
