Enver Hasani, Haki Demolli, Arsim Bajrami dhe Hajredin Kuçi janë katër profesorët e Universitetit të Prishtinës që janë ankuar kundër vendimit të Rektoratit që i heq nga lista e pagave si profesorë të rregullt. Gazeta Jeta në Kosovë ka monitoruar vijueshmërinë në ligjërata të katër profesorëve që mbajnë pozita të rëndësishme publike. Hasani e Demolli nuk po gjejnë kohë që të mbajnë ligjëratat, ndërsa Bajrami po i mban ato duke e lënë anash punën e tij si ministër i Arsimit. Ndërsa ministri Hajredin Kuçi është i rregullt në Fakultetin Juridik, por nuk i mban ligjëratat në Fakultetin Filozofik.