Gjilan, parregullsi të mëdha tek votat e VV-së dhe LDK-së

Monitoruesit e KALLXO.com, të cilët janë angazhuar të përcjellin procesin e rinumërimit të rezultateve, kanë identifikuar mospërputhje të rezultateve në disa nga qendrat në Gjilan,  për të cilat KQZ ka marrë vendim për rinumërimin e tyre.

Mospërputhja më e madhe e rezultateve është vërejtur në qendrën 0401X/03R e cila ishte në shkollën fillore ‘Thimi Mitko’ në Gjilan.

114 kandidatëve të partive politike iu ndryshua rezultati i votave, dikujt iu hekën e dikujt iu shtuan votat, pas vendimit të KQZ-së për rinumërim.

Kandidatët për deputet nga  Vetëvendosje, LDK, PDK, Koalicioni NISMA-AKR-PD, Koalicioni AAK-PSD, JGP, Koalicioni Vakat, Fjala, PEK dhe Lista Serbe, kanë pësuar ndryshime në numërimin e votave të tyre pas rinumërimit.

Ndërsa ndryshimet më të mëdha në rezultate vërehen tek Lëvizja Vetëvendosje dhe Lidhja Demokratike e Kosovës, parti këto që kanë pasur numrin më të madh të votave.

KALLXO.com ka monitoruar rinumërimin edhe tri vendvotimeve të tjera në shkollën ‘Abaz Ajeti’, mirëpo aty nuk janë vërejtur mospërputhje të mëdha të rezultateve pas rinumërimit.

Lëvizja Vetëvendosje

Tek Lëvizja Vetëvendosje është vërejtur një dallim i madh tek rezultatet pas rinumërimit. 54 kandidatëve për deputet të kësaj partia, rinumërimi i solli ndryshim të dukshëm të numrit të votave. Kandidates Arbresha Kryeziu nga zero vota sa kishte në fillim rinumërimi ia solli 76 vota, edhe kandidates Arijeta Raxhepi nga zero vota sa kishte në fillim rinumërimi ia solli 36 vota.

Ndërsa kandidatit Alban Hyseni, rinumërimi ia shtoi 12 vota poashtu edhe kandidates Labinotë Demi-Murtezi rinumërimi ia shtoi 13 vota.

Në total Lëvizja Vetëvendosje në këtë qendër mori 180 vota.

Lidhja Demokratike e Kosovës

Edhe tek Lidhja Demokratike e Kosovës (LDK) rinumërimi ka sjellë ndryshime të dukshme, 22 kandidatëve të kësaj partie i ka ndryshuar numri i votave pas rinumërimit. Ish deputetes Valentina Bunjaku e cila synon një mandate të dytë në Kuvendin e Kosovës pas rinumërimit në këtë qendër iu shtuan 9 vota.

Edhe kandidatit nga kjo parti, Bajrush Ymeri rinumërimi ia rriti numrin e votave, nga 4 vota sa kishte në fillim ai mori 15.

Partia e Isa Mustafës në këtë qendër të votimit ka marrë 80 vota.

Partia Demokratike e Kosovës

Rinumërimi i votave ia ndryshoi rezultatin 11 kandidatëve të kësaj partie, duke përfshirë edhe kryetarin Veseli i cili nga 45 vota mori, 44.

Ndërsa  Shqir Totajt rinumërimi ia humbi të vetmen votë që e kishte. E kandidates Leonora Morina-Bunjaku nga 3 vota sa kishte, rinumërimi ia shtoi edhe 14 vota të tjera.

E në këtë qendër PDK-ja mori 59 vota.

Koalicioni  AAK-PSD 100 për qind Kosovë

Rinumërimi nuk solli ndryshim të dukshëm as te votat e koalicionin e Ramush Haradinajt dhe Shpend Ahmetit. Këtij të fundit rinumërimi  ia shtoi vetëm 3 vota, përderisa Faton Jakupit rinumërimi ia shtoi 6 vota.

Koalicioni në këtë qendër të votimit në qytetin e Gjilanit mori vetëm 17 vota.

Koalicioni NISMA-AKR-PD

Koalicioni NISMA-AKR-PD I cili është duke insistuar vazhdimisht për rinumërim të të gjitha kutive të votimit në nivel vendi, rinumërimi në qendrën 0401X/03R në shkollën fillore ‘Thimi Mitko’ nuk ia ndryshoi dukshëm numrin e votave.

Kandidatit Isa Xhemajlaj, rinumërimi ia humbi 7 votat që i kishte, ndërsa kandidates Xhylije Ibrahimi ia shtoi një votë.

Ndërsa në total në këtë qendër ky koalicion mori 11 vota.

Edhe tek Partia e Bashkuar e Goranëve (JGP), rinumërimi solli ndryshime, nga një votë të cilën e mori kjo parti, pas rinumërimit 4 kandidatëve iu shtuan nga një votë.

Edhe koalicioni VAKAT, në këtë qendër të votimit ka marrë vetëm një votë, ndërsa pas rivotimit kandidatët në listën e mëposhtme kanë marrë nga një votë.

Edhe tek partia Fjala, pati ndryshime të rezultatit, kandidatit Lulzim Bajramit iu shtua një votë.

Partia Euroatlantike e Kosovës (PEK) në këtë qendër mori vetëm dy vota, ndërsa kandidatëve të kësaj partie vetëm pas rinumërimit iu shtuan nga dy vota.

Lista Serbe në këtë qendër ka marrë vetëm një votë, por  nga një vote për 5 kandidatët e kësaj partie u shkruan vetëm pas rinumërimit të rezultateve në këtë qendër.

Komisioner në këtë qendër ku janë hasur këto mospërputhje të mëdha të rezultateve kanë qenë: Qendresa Sahiti, Valon Aliu, Mitat Stublla dhe Yll Sllamniku.