Fillojnë punimet në rrugën Gërlicë e Epërme - Shtërpcë – Brezovicë
Ministria e Infrastrukturës dhe Transportit ka marr pjesë në përurimin i fillimit te punimeve në rehabilitimin e rrugës regjionale Gërlicë e Epërme – Shtërpcë – Brezovicë.
Sipas një komunikate për media, rehabilitimi i kësaj rruge me gjatësi prej 15.3 kilometra, ka kosto mbi 1.2 milionë euro, dhe se punimet për këtë segment parashihet të përfundojnë brenda 180 ditë pune.
Ndërkaq për segmentin e dytë të rrugës deri në Qendrën e Skijimit dhe Prevallë, me gjatësi prej 19.4 kilometra, të enjten është nënshkruar kontrata me vlerë afër dy milionë euro.
“Ministri Lekaj shprehu kënaqësinë që me këtë investim të Ministrisë së Infrastrukturës dhe Transportit, i hapet perspektivë edhe më e madhe kësaj zone turistike. Ai shtoi se Qeveria e Kosovës ka prioritet investimin në turizëm në të gjitha rajonet e Kosovës ku ka potencial turistik”, thuhet në njoftim.
Tutje, thuhet se kryetari i Federatës së Skijimit të Kosovës, Milaim Kelmendi, e falënderoi ministrinë që nëpërmjet infrastrukturës po lehtëson zhvillimin e sportit që ai përfaqëson, jo vetëm në Brezovicë, por edhe në bjeshkët tjera.
