Thaçi e ulë në klasin e parë vetëm njërin prej këshilltarëve
Në udhëtimin e tij për në ShBA në prill të 2012-tës Hashim Thaçi kishte ulur në ulëset Bussnes Clas vetëm Bekim Çollakun. Faturat e biletave të aeroplanit dëshmojnë se pjesa tjetër e ekipit ishte ulur në ulëset e klasit ekonomik që atëkohë kushtonin rreth 2 mijë euro më lirë.
Kallxo.com zbulon se për udhëtimin në vizitë në Amerikë, Hashim Thaçi kishte paguar 3 mijë e 240 euro. Por, i vetmi që kishte pasur mundësinë të ‘ulet’ afër shefit, ishte këshilltari i tij, Bekim Çollaku, bileta të cilit kishte kushtuar po aq sa e atëkohë kryeministrit.
Për Thaçin e Çollakun shteti kishte paguar 6 mijë e 480 euro. Por, shumë më lirë kishin kushtuar biletat e vartësve tjerë, edhe pse të gjitha biletat ishin rezervuar në të njëjtën ditë.
Bashkë me Thaçin, në Amerikë në prill të 2012-tës kishin shkuar edhe Dhurata Hoxha, Mrika Kotorri, Edi Sejdiu, Astrit Ibrahimi dhe Xhavit Ferizi. Por biletat për secilin nga ta kishin kushtuar nga 922 euro. Ose në total për 5 zyrtarë shteti kishte paguar 4 mijë e 610 euro.
Llogaritja tregon se dy biletat e Thaçit dhe Çollakut, kishin kushtuar afër 2 mijë euro më shumë se sa të gjitha biletat e 5 vartësve të ish kryeministrit.
Behgjet Pacolli flen në hotelet e shtrenjta ‘Hilton’ e ‘Raphael’ me para të buxhetit
Në dosjen prej qindra faturash të siguruar pasi BIRN ka paditur Zyrën e Kryeministrit në gjykatë, do publikohen fatura të shpenzimeve për 20 muaj qeverisje të Hashim Thaçit përfshirë këtu shpenzimet e 5 zëvendëskryeministrave tjerë të asaj kohe: Bujar Bukoshi, Edita Tahiri, Hajredin Kuçi dhe Behgjet Pacolli
Pjesë e faturave janë edhe shpenzimet e kryera nga këshilltarë e shefa të kabineteve e deri te bodigardët e qeveritarëve të lartë.
Në dosjen “Sa han Shefi” e cila tashmë është aktive në KALLXO.com, çdo ditë do publikohen fatura të reja të shpenzimeve të shoqëruara me shkrime dhe dëshmi për shpenzimet.
