Presidenti Hashim Thaçi - Foto: KALLXO.com

Para të shtetit shpenzohen për Red Bull

Në faturat e shpenzimeve të qeverisë së Hashim Thaçit pijet energjike Red Bull nuk kanë munguar në drekat e darkat zyrtare.

Në dokumentet e siguruara nga KALLXO.com ka dëshmi se përpos alkoolit verërave të shtrenjta e ushqimeve të detit kabineti i Hashim Thaçit kishte konsumuar edhe Red Bull.

Një faturë e tillë është ajo e datës 10 tetor 2011-të ku në një restorant në dalje të Prishtinës Thaçi kishte harxhuar 84 euro. Në faturë shihet se është paguar Red Bull, raki “Viliamovka”, ujë mineral dhe pjesa tjetër ishte shpenzuar në ushqime si pjekje viçi, omlet me djathë e pogaçe.

KALLXO.com ka nisur publikimin e faturave të shpenzimeve të Presidentit Hashim Thaçi në kohën kur ai ishte kryeministër i vendit.

Në dosjen prej qindra faturash të siguruar pasi BIRN ka paditur Zyrën e Kryeministrit në gjykatë, do publikohen fatura të shpenzimeve për 20 muaj qeverisje të Hashim Thaçit përfshirë këtu shpenzimet e zëvendëskryeministrave tjerë të asaj kohe: Bujar Bukoshi, Edita Tahiri, Hajredin Kuçi dhe Behgjet Pacolli.

Pjesë e faturave janë edhe shpenzimet e kryera nga këshilltarë e shefa të kabineteve e deri te bodigardët e qeveritarëve të lartë.

Në dosjen “Sa Han Shefi” e cila tashmë është aktive në KALLXO.com, çdo ditë do publikohen fatura të reja të shpenzimeve të shoqëruara me shkrime dhe dëshmi për shpenzimet.