Komunarët e Klinës adhurues të pulave të pjekura
Nëse zyrtarët e komunave tjera parapëlqejnë që në dreka zyrtare të hanë ushqime deti, për komunarët e Klinës, pula është ushqimi më i shpeshtë që ata e hanë dhe pastaj e paguajnë me para të buxhetit të Komunës.
Në faturat e shpenzimeve për dreka dhe darka zyrtare të Komunës së Klinës, ushqimi më shpeshtë që ata porosisin është gjysëm pule e pjekur.
Në 10 dreka zyrtare që i ka analizuar KALLXO.com, këta komunarë kanë porositur në total 94 gjysmë pula.
Një gjysmë pulë tek vendi i pulave në Zllakuqan kushton 2 euro e 80 cent.
Në total, vetëm për pula në këto 10 dreka janë shpenzuar mbi 260 euro.
Përvec pulave, në këto dreka, pula është shoqëruar edhe me sallatë dhe pije të ndryshme në kanaqe e ujë.
Në disa prej këtyre drekave të pulave kishin qenë kabineti i kryetarit, pastaj në disa raste zyrtarë të Drejtorisë së Urbanizmit e Shërbimeve Publike etj.
Mirëpo ata jo gjithmonë i kishin qëndruar besnik mishit të pulës.
Në korrik të vitit të kaluar, zyrtarët e Drejtorisë së Bujqësisë dhe Zhvillimit Rural kishin ngrënë 5 kg mish, me vlerë totale 70 euro.
Përvec 5 kg mish, në këtë drekë ishin porositur edhe 5 biftek, me vlerë totale 25 euro.
KALLXO.com ka filluar publikimin e dosjes “Sa han Kryetari”, ku do të bëhen publike shpenzimet e luksit nga përfaqësuesit e komunave të Republikës së Kosovës.
Ky projekt mbështetet nga Fondacioni i Kosovës për Shoqëri të Hapur – KFOS. Përmbajtja është përgjegjësi e BIRN dhe në asnjë mënyrë nuk mund të konsiderohet si qëndrim i KFOS-it.