Sami Lushtaku, kryetar i komunës së Skënderajt. Foto: Kallxo.com

Dështon seanca ndaj Sami Lushtakut dhe të tjerëve

Seanca gjyqësore në gjykimin ndaj Sami Lushtakut dhe gjashtë personave të tjerë të akuzuar lidhur me tenderin gjashtë milionësh për sigurimin e objekteve të KEK-ut ka dështuar.

Gjatë kësaj seance gjyqësore ka qenë e paraparë që të akuzuarit të vazhdojnë me dhënien e mbrojtjes.

Por për shkak se kryetari i trupit gjykues, Gjykatësi Beqir Kalludra ka qenë i obliguar që të marrë pjesë në një trajnim, seanca gjyqësore është anuluar.

Seanca e radhës është caktuar për datën 14 dhjetor.

Të akuzuar për këtë tender janë ish-drejtori i KEK-ut Arben Gjukaj, ish-kreu i Organit Shqyrtues të Prokurimit Hysni Hoxha, ish- kryetari i Skenderajt Sami Lushtaku, Esat Tahiri, Milazim Lushtaku, Driton Pruthi e Azem Duraku.

Në këtë rast gjyqësor Esat Tahiri dhe Milazim Lushtaku akuzohen për veprën penale mashtrim, ish-drejtori i prokurimit Driton Pruthi, ish-drejtori i KEK-ut Arben Gjukaj dhe ish-kreu i OSHP-së Hysni Hoxha akuzohen për keqpërdorim të pozitës ose autorizimit zyrtar, ish-kryetari i Skenderajt Sami Lushtaku akuzohet për shtytje në keqpërdorim të detyrës zyrtare, ndërsa Azem Duraku akuzohet për nxitje në keqpërdorim.

Çështja e këtij tenderi të KEK-ut kishte shkuar më herët deri në Gjykatën Kushtetuese, e cila refuzoi kërkesën e të akuzuarve për t’i vënë masë të përkohshme procesit.

Për tenderin e KEK-ut Gazeta Jeta në Kosovë kishte shkruar në vitin 2014, ndërsa hetimet lidhur me këtë rast kishin filluar më 5 tetor 2012, e aktakuza ishte ngritur më 16 janar 2015.

Tender Milionësh për Ish-Truprojën dhe Nipin e Sami Lushtakut

Aktualisht, kjo është aktakuza e dytë që rëndon mbi Sami Lushtakun.

https://kallxo.com/edhe-dy-aktakuza-rendojne-mbi-sami-lushtakun/