Në një nga seancat e gjykimi të Nexhat Ademit FOTO: KALLXO.com
Dënohet i akuzuari për terrorizëm
Nexhat Ademi i akuzuar për veprën penale të organizimit dhe pjesëmarrjes në grupet terroriste, Gjykata Themelore në Prishtinë e ka dënuar me dy vjet burgim me kusht.
Gjykatësi Vesel Ismajli deklaroi se ky dënim nuk do të ekzekutohet nëse i akuzuari brenda tri viteve nuk kryen ndonjë vepër tjetër penale.
Lajmin për Kallxo.com e konfirmoi gjykatësi Vesel Ismajli.
Ademit i është ndërprerë edhe masa e paraburgimi.
Gjykata Themelore në Prishtinë në mars të vitit të kaluar, Nexhat Ademin e kishte dënuar me tre vite burgim për veprën penale të organizimit dhe pjesëmarrjes në grupet terroriste.
Ndryshe, këtë çështje penale, Gjykata e Apelit në Prishtinë e ka kthyer në rigjykim me arsyetimin se ky aktgjykim i gjykatës së shkallës së parë është nxjerrë me shkelje të dispozitave procedurale dhe se në të nuk janë paraqitur fare arsyet në lidhje me faktet vendimtare.
Prokuroria Speciale e Republikës së Kosovës (PSRK), Nexhat Ademin e akuzonte se më 17 janar 2014 ka udhëtuar nga Aeroporti i Prishtinës për në Stamboll, e pastaj nga Stambolli ka udhëtuar për në qytetin Gazientep të Turqisë, afër kufirit me Sirinë, e nga aty ka arritur të kalojë në territorin e Sirisë me dashje që t’i bashkohet dhe të bëhet pjesë e organizatës “Al-Nusra”.
Sipas aktakuzës, i pandehuri Ademi pasi që ka qëndruar një javë në Siri është kthyer në Kosovë.
Prokuroria pretendon se Ademi më 4 mars 2016 ka provuar që përsëri të shkojë në Siri, duke shfrytëzuar rrugën Shkup-Stamboll, mirëpo i njëjti pasi mbërrin në Aeroportin e Stambollit, autoritetet turke e ndalojnë, e pastaj e dëbojnë për shkak të lidhjes së tij me zonën e luftës.