Dalin rezultatet preliminare për prokurorë të rinj
Pas një procesi të rekrutimit i cili zgjati pothuajse për 6 muaj, Këshilli Prokurorial i Republikë s së Kosovës, përkatësisht Komisioni për Rekrutim i Këshillit Prokurorial të Kosovës ka shpallur listën preliminare të rezultateve të kandidatëve të cilët kanë aplikuar për t’u bërë prokurorë të shtetit.
Procesi i rekrutimit është përbërë nga tre faza: testi kualifikues, testi me shkrim dhe Intervistat me gojë.
Fillimisht për pozitën e prokurorit kanë aplikuar 191 persona ndërsa në fazën e fundit të intervistimit kanë kaluar 50 kandidatë.
Në mesin e këtyre 50 kandidatëve, 10 prej tyre do të emërohen prokurorë të shtetit në nivel të Prokurorive Themelore të Republikës së Kosovës.
- Prokuroria Themelore Prishtinë – gjashtë (6) pozita
- Prokuroria Themelore Ferizaj – një (1) pozitë
- Prokuroria Themelore Prizren – një (1) pozitë
- Prokuroria Themelore Pejë – një (1) pozitë
- Prokuroria Themelore Gjakovë – një (1) pozitë
Listën preliminare të rezultateve të kandidatëve të cilët kanë aplikuar për prokuror të shtetit mund ta gjeni në këtë link.
Në mesin e dhjetë kandidatëve të cilët janë vlerësuar me pikët me të larta janë këta persona:
- Besnik Jakupi, me 89.2 pikë
- Ardian Emini, me 87.4 pikë
- Elza Bajrami, me 87 pikë
- Labinot Jetishi, me 86.8 pikë
- Mimoza Shala, me 86 pikë
- Arlinda Gacaferri, me 86 pikë
- Sadri Alija, me 85.6 pikë
- Eset Rama, me 84.8 pikë
- Bekim Kodraliu, me 84.8 pikë
- Kastriot Memaj, me 81.6 pikë
Pikë të njëjta me kandidatin e dhjetë i cili gjendet në mesin e dhjetë kandidatëve me pikët më të larta kanë edhe dy kandidatë të tjerë Dorjan Juniku me 81.6 pikë si dhe Arianit Salihu me 81.6 pikë.
Këshilli Prokurorial i Kosovës është i thirrur që të propozojë te Presidenti kandidatët më të vlerësuar për emërim si prokurorë të shtetit.
Pas emërimit nga Presidenti i Kosovës, këta prokurorë, me përjashtim të atyre që kanë përvojë paraprake si prokuror, i nënshtrohen trajnimit fillestar që do të organizohet nga Akademia e Drejtësisë.
Trajnimi fillestar duhet të zgjasë dymbëdhjetë (12) muaj, në bazë legjislacionit në fuqi dhe prokurorët e emëruar do të vlerësohen pas rezultateve të trajnimit fillestar, në bazë të dispozitave relevante të ligjit. Periudha e trajnimit fillestar do të zgjatet për ata prokurorë që dështojnë ta përfundojnë në mënyrë adekuate trajnimin fillestar, siç është përcaktuar nga Akademia e Drejtësisë.
Gjatë trajnimit fillestar, prokurorëve nuk do t’u caktohen raste.
Rrjeti Ballkanik për Gazetari Hulumtuese (BIRN) i ka monitoruar të gjitha fazat e këtij procesi të rekrutimit.
