I është bashkuar BIRN-it në korrik 2024 dhe punon si gazetar e përkthyes.

Gazetarinë e ka filluar në qershor 2007 në Grupin KOHA (Koha Ditore, KTV dhe koha.net), ku ka punuar deri në maj 2023 si gazetar reportazhi, përkthyes e redaktor i lajmeve ndërkombëtare dhe autor i emisionit Cosmo. Paralelisht, gjatë viteve 2009-2013 ka punuar si mësimdhënës i gjuhës angleze në dy shkolla fillore në rrethin e Ferizajt, ndërkaq gjatë viteve 2015-2017 si përkthyes i lajmeve dhe analizave ndërkombëtare në portalin dialogplus.ch

Prej qershorit deri në tetor të vitit 2023 ishte menaxher i programeve në organizatën joqeveritare, INPO, në Ferizaj, ndërkaq prej nëntorit 2023 punon si gazetar në qendrën multimediale, Tema, në Ferizaj. Njëherësh është bashkëpunëtor i jashtëm i revistës elektronike Kosovo 2.0.

Angazhimi i kombinuar si gazetar reportazhi dhe përkthyes i redaksisë së lajmeve ndërkombëtare në fakt ishte rezultat i kureshtjes e studimit të marrëdhënieve ndërkombëtare dhe eksplorimit të jetës së rëndomtë njerëzve anembanë botës nëpërmjet përkthimit të lajmeve, analizave dhe rrëfimeve të mediave më të mëdha ndërkombëtare.

Ka diplomuar në gazetari në nivelin baçelor në Universitetin e Prishtinës, ku po vazhdon ta studiojë gazetarinë dhe komunikimin edhe në nivelin master. Ka përfunduar gjuhën angleze në nivelin baçelor në Kolegjin AAB, ku tani është para përfundimit të studimve të administratës publike dhe diplomacisë në nivelin master.

Miqtë gazetarë thonë se e “tepron” me përdorimin e shprehjeve të Gabriel Garcia Marquezit për lidhjen ndërmjet gazetarisë dhe letërsisë. Por shokëve nuk u bindet as kur i kërkojnë të heqë dorë nga tifozllëku për Arsenalin, për të “ka harru” kur e ka fitu titullin e fundit kampion.