ASHAK promovon tri botime të saja në Austri
Akademia e Shkencave dhe Arteve e Kosovës do të promovojë nesër në Vjenë të Austrisë disa nga botimet e saj më të reja.
Përmes një komunikate për media, ASHAK njofton se nesër, më 12 qershor 2019 në orën 18 në Institutin për Kohën e Re dhe hulumtimin e historisë bashkëkohore të Akademisë Austriake të Shkencave mbahet përurimi i tri botimeve të reja të Seksionit të Filologjisë.
Sipas komunikatës në Vjenë do të promovohet veprat: “Gramatikë e krahasuar e gjuhëve të Ballkanit I. Krahasim morfologjik-tipologjik i shqipes me gjuhët e tjera të Ballkanit”, e Wilfried Fiedler, anëtar i jashtëm i ASHAK-ut; “Studimet albanistike në vendet ku flitet gjermanisht”, dhe “Gjurmime linguistike-historik e kulturore në fushën e shqipes” (1923) të Norbert Jokl, botuar gjermanisht dhe shqip.
Për të gjitha këto botime do të flasin akademik Rexhep Ismajli, anëtar i ASHAK-ut, akademik Wilfried Fiedler, anëtar i jashtëm i ASHAK-ut dhe Prof. Dr. Heiner Eichner, anëtar korrespondent i Akademisë Austriake të Shkencave.
Pjesë e këtij promovimi do të jetë dhe sekretari i Seksionit të Filologjisë së ASHAK-ut, akademik Eqrem Basha.
Gjatë këtij promovimi do të paraqiten dhe botimet e tjera në fushën e filologjisë të këtij Seksioni të ASHAK-ut, në mënyrë të veçantë botimet e projektit afatgjatë për botimit të veprave të albanologëve të traditës.