Ferizaj, 14 mësimdhënës dhe dy nxënës rezultuan pozitivë me COVID-19
Në komunën e Ferizajt aktualisht janë 14 mësimdhënës dhe dy nxënës të infektuar me coronavirus.
Këtë e ka konfirmuar për KALLXO.com Bashkim Bytyqi nga Drejtoria e Arsimit.
“Janë testuar 86 nxënës të dyshuar për Covid-19. Vetëm 2 nxënës kanë rezultuar pozitivë me Covid. Ende nuk janë shëruar”, tregoi ai.
Ai, gjithashtu tha se Shkolla Fillore e Mesme e Ulët, ‘Ali Hadri’ në fshatin Mirash të Ferizajt nga 26 tetori procesin mësimorë është duke e zhvilluar online.
Mungesa e hapësirave të brendshme ka bërë që Gjimnazi shkencor, shoqëror dhe shkolla e mjekësisë të punojnë sipas planeve A, B dhe C.
“Gjimnazi shkencor “Kuvendi i Arbërit”, Gjimnazi shoqëror “Dr. Shaban Hashani” dhe Shkolla e Mjekësisë “Elena Gjika”, punojnë sipas skenarit A, B dhe C për shkak të mungesës së hapësirës së brendshme”, tha Bytyqi për KALLXO.com.
Në nivel vendi deri më tani 14 shkolla janë mbyllur përderisa janë infektuar mbi 270 nxënës.
