12 shkolla të Pejës zbatojnë kërkesën e SBAShK-ut, nuk mbahet mësimi
12 Shkolla të Komunës së Pejës i janë bindur thirrjeve të SBAShK, që dita e hënë të jetë ditë pushimi, për nder të festës së 28-nëntorit.
Këtë e ka konfirmuar për KALLXO.com drejtori i Arsimit në këtë komunë, Besim Avdimetaj.
“20 shkolla punojnë, 12 nuk punojnë dhe 3 shkolla janë në mësim online. Kjo është gjendja në shkollat e Pejës. Për këto 12 shkollat që s’janë duke mbajtur mësim, përgjegjësinë do ta mbajnë drejtorët”, tha ai.
Kryetari i SBAShK, Rrahman Jasharaj ka deklaruar se 90 për qind e shkollave të Kosovës i janë bindur thirrjeve të tyre që dita e hënë të jetë ditë pushimi, për nder të festës së 28-nëntorit.
Në anën tjetër, Ministria e Arsimit u ka bërë thirrje shkollave që të mbajnë mësim.
Qeveria e Kosovës, më 27 nëntor kishte bërë të ditur se dita e hënë, 30 nëntor 2020, do të jetë ditë e rregullt e punës.
Për këtë vendim, kryeministri, Avdullah Hoti u kritikua sot nga deputetët e opozitës.
Por, ai tha se se deputetët e kanë ftuar në raportim me datën 30 dhjetor dhe se ka zbatuar agjendën zyrtare të trashëguar.
Kryeministri Hoti i përgjigjet Ganimete Musliut për 28 Nëntorin
