Akuza për Punësime të Militantëve të VV-së në Prishtinë

Partia Demokratike e Kosovës, dega në Prishtinë përmes një komunikate ka ngritur shqetësime për mbushjen e Komunës së Prishtinës me militantë të Lëvizjes Vetëvendosje, që si të punësuar nuk janë as qytetarë të Prishtinës, por vetëm pjesë siç kanë thënë “e bandës mollotov të kryebanditit Dardan Molliqaj”, për të cilët janë harxhuar rreth 3 milionë euro para të taksapaguesve.

Sekretari i Degës së PDK-së në Prishtinë, Bujar Cakolli, ka thënë se sipas raportit të Auditorit Gjeneral, Lëvizja Vetëvendosje, nëpërmjet Dardan Molliqajt për dy vjet ka punësuar kundërligjshëm 486 njerëz me kontrata të veçanta.

“Pagat e këtyre mercenarëve politikë i kanë kushtuar rreth tre milionë euro qytetarëve të Prishtinës në vitet 2015-2016”, ka thënë Cakolli.

Ai ka thënë se këto fakte rëndohen edhe më shumë kur kemi parasysh se rreth 300 prej personave të punësuar në këto dy vjet, sipas informacioneve brenda Komunës së Prishtinës dhe nga qytetarët e shumtë të Prishtinës, janë militantë të Vetëvendosjes nga komunat e tjera të Kosovës.

“Shumica dërrmuese e këtyre të punësuarve janë pjesëtarë të sekretariatit të brendshëm të kryebanditit mollotovian Dardan Molliqaj dhe jo aktivistë të rëndomtë të kësaj partie. Pra, këta persona janë bandë e tij dhe jo aktivistë të zakonshëm politikë”, ka thënë Cakolli.

Cakolli ka thënë se këta persona të dyshimtë edhe për veprime të tjera delikuente përdoren si mercenarë politikë prej tij për çdo gjë që ai u thotë të bëjnë në rolin e shefit të bandës.

“Edhe për të djegur vetura zyrtare, edhe për t’i sulmuar zyrtarët e shtetit, edhe për të hedhur gurë dhe mollotov mbi policinë e vendit. Pra, për gjithçka të keqe. Madje, produkt i tyre janë edhe banda e zollës, e cila është në proces gjyqësor për sulmin mbi Kuvendin e Kosovës”, ka thënë Cakolli.

Sipas tij, këta i shërbejnë Vetëvendosjes në forma të ndryshme, por edhe kërcënojnë, shantazhojnë, linçojnë nëpër rrjete sociale dhe demolojnë, si dhe i përcjellin personat dhe grupet me direktiva të Dardan Molliqajt.

Sekretari i PDK-së në Prishtinë ka prezantuar edhe një përmbledhje të fotografive të disa prej të punësuarve në Komunën e Prishtinës, duke thënë se ata janë militantë të Vetëvendosjes nga komunat e tjera të Kosovës.

“Pra, përfundimisht, sot Komuna e Prishtinës qeveriset më së paku prej prishtinasve. Në Komunën e Prishtinës, siç e patë edhe nga materiali i prezantuar, më së paku punësohen qytetarë të Prishtinës”, ka thënë ai.

Kurse, asamblistja e PDK-së në Komunën e Prishtinës, Laura Zherka, ka thënë se me këtë paligjshmëri perfide ata kanë dëmtuar rëndë buxhetin e taksapaguesve prishtinas dhe, për më keq, kanë financuar blerjen kriminale të votës në gjithë Kosovën.

Cakolli edhe më herët kishte akuzuar Komunën e Prishtinës për punësime partiake.