Aktakuzë për tentim vrasje në Prizren

Prokuroria Themelore në Prizren  ka ngritur aktakuzë kundër katër personave me iniciale  F.S., B.S., E.L., dhe E.XH., për shkak të veprës penale tentim vrasje dhe armëmbajtje pa leje.

“Sipas aktakuzës, me datë 20.06.2018, rreth orës 23:55 min., në Prizren, të pandehurit F.S., B.S. dhe E.L., në cilësi të bashkëkryerësve, me dashje tentojnë ta privojnë nga jeta personin tjetër, në atë mënyrë që pas një mosmarrëveshje paraprake që kishin me të pandehurin E.XH., pajisen me armë zjarri dhe me të arritur te vendi kritik, në momentin kur e vërejnë E.XH., i cili ishte duke zbritur nga automjeti – taxi, shtënë në drejtim të tij me armë zjarri”, thuhet në njoftimin e Prokurorisë në Prizren.

Po sipas aktakuzës, i pandehuri E.XH., duke zbritur nga taxi, dëgjon të shtënat, dhe në këtë mënyrë nxjerrë pushkën automatike dhe drejtohet në drejtim të të shtënave, përkatësisht në drejtim të pandehurve F.S.,B.S., dhe E.L., shtënë në drejtim të tyre disa herë, dhe, pasi që edhe të pandehurit e tjerë vazhdojnë të shtënë me armë në drejtimin e tij, atëherë të gjithë largohen me shpejtësi nga vendi i ngjarjes.

Me këto veprime, sipas aktakuzës  ekziston dyshimi i bazuar mirë se të pandehurit F.S., B.S., dhe E.L., (në cilësi të bashkëkryerësve) dhe në anën tjetër i pandehuri E.XH., kanë kryer veprën penale “Vrasje e mbetur në tentativë”.

Gjithashtu, sipas aktakuzës të pandehurit, secili veç e veç, akuzohen edhe për veprën penale “Mbajtja në pronësi, në kontroll dhe në posedim të paautorizuar të armëve”.

Të pandehurit gjenden në paraburgim, dhe prokurori i çështjes me rastin e ngritjes së aktakuzës, i ka propozuar Gjykatës që të konfiskohen armët dhe të njëjtit të shpallen fajtor dhe të dënohen sipas ligjit për veprat penale të cilat u vihen në barrë.