Aksioni i Studentëve Para Kishës
Një grup studentësh nga organizatat studentore të UP-së në orën 13:00 u mblodhën para kishës ortodokse në hapësirën universitare.
Studentët objektin e ndërtuar në kohën e Sllobodan Millosheviqit e konsiderojnë okupues të hapësirës universitare, ndërsa kishin për qëllim të vendosin një pankartë te rrethojat e kësaj kishe që shpjegon këtë gjë.
Policia që rrethoi objektin e kishës nuk i lejon protestuesit t’i afrohen asaj, duke i shtyrë ata në drejtim të kampusit universitar.
Por më vonë studentët arritën ta vendosin pankartën në rrethoja, ndërsa atë e hoqi policia pas pak minutave.
Ndërhyrjen e policisë për të mos lejuar studentët t’i afrohen objektit të kishës e dënoi Lëvizja “Vetëvendosje”.
“Lëvizja ‘Vetëvendosje’ e dënon ashpër intervenimin e dhunshëm të Policisë së Kosovës ndaj studentëve të Universitetit të Prishtinës, të cilët thjesht vendosën një pano prej letre para kësaj kishe,” thuhet në reagimin e “Vetëvendosjes”.
Lëvizja për Barazi-Studim, Veprim, Kritikë, bashkë me organizata tjera studentore paralajmëroi sot një aksion të kundërshtimit të funksionalizimit të kishës së papërfunduar brenda kampusit universitar.
Objekti i kishës dhe hapësira jashtë saj nisi të pastrohet para disa ditësh, ndërsa Inspektorati i Komunës së Prishtinës ndaloi të enjten këto punime.
http://kallxo.com/inspekcioni-ndalon-punimet-te-kisha-ne-kampusin-universitar/
Një grup studentësh kundërshtoi dje pastrimin e objektit të kësaj kishe, duke kërkuar që ajo ose të rrënohet, ose të përshtatet për nevojat e Universitetit të Prishtinës.
Në korrik rreth kësaj kishe ishte kërkuar për varreza masive, por kërkimet nuk zbuluan eshtra të të vrarëve gjatë luftës.
http://kallxo.com/germohet-lokacioni-dyte-afer-kishes-ortodokse/