Onkologjia photo

20 mijë shërbime onkologjike për katër muaj, rritje e numrit të të sëmurëve 

Janë dhënë 20 mijë shërbime onkologjike për pacientët e sëmurë me kancer për katër muajt e parë të këtij viti, njofton QKUK.

“Gjatë kësaj kohe, stafi mjekësor ka kryer 12 mijë kontrolle, ka dhënë 8100 doza të kimioterapisë dhe 4200 terapi intravenoze. Te lista e shërbimeve mjekësore hyjnë edhe 501 raste të reja, të evidentuara me kancer, në periudhën janar-prill 2019”, thuhet në njoftim.

Sipas drejtorit të Klinikës së Onkologjisë, Ilir Kurtishi, në krahasim me vitin e kaluar, ka një rritje prej 5% të rasteve të reja më këto sëmundje.

QKUK njofton se sipas të dhënave të nxjerra nga raportet e punës për vitin 2018, në të njëjtën periudhë kohore kishte 475 pacientë.

“Nuk është shumë alarmante kjo, pasi që, në krahasim me vendet fqinje, ne kemi numër shumë më të vogël. Në Maqedoni, gati 5 mijë raste të reja diagnostikohen në vit, me një popullatë pak ma të madhe se Kosova”, thotë Kurtishi.

Sipas tij në Kosovë rastet me kancer janë më të rralla dhe një prej faktorëve është që ka një popullatë të re.

QKUK thotë se kanceri i gjirit vazhdon të dominojë.

“Deri në këtë kohë janë paraqitur 121 raste. Në vendin e dytë radhitet kanceri i mushkërive me 82 raste” thuhet në njoftim.

Sipas tyre kanceri te tubi digjestiv, përfshirë lukthin, pankreasin dhe zorrët e trasha, ka prekur 109 pacientë. Kanceri i organeve gjenitale është paraqitur tek 108 persona, meshkuj dhe femra, ndërsa 83 raste janë identifikuar me kancer në organe tjera. Kurtishi, më tutje thotë se evidentimi i rasteve bëhet me rregull.

“Shpresojmë që shpejt të kemi edhe kancer-regjistër në Kosovë, pra të kemi të dhëna të sakta për secilin qytetar të Kosovës, i cili diagnostikohet me kancer”, pohon Kurtishi.

Pacientja N.K. është shprehur e kënaqur me mënyrën e trajtimit në Institutin e Onkologjisë të Qendrës Klinike Universitare të Kosovës.

“Shërbimi është shumë i mirë. Stafi mjekësor ka sjellje të shkëlqyeshme me ne. Neve një fjalë e mirë na shëron, e lëre më shërbimi i mirë.  Nuk kam besuar që këtu ofrohen shërbime kaq të mira. Pasi kam hyrë këtu, e kam pa vetë, nuk kam fjalë ta përshkruaj”, thotë ajo.

Në Onkologji trajtohen më shumë se 1mijë e 500 pacientë, përfshirë pacientët që vazhdojnë trajtimin nga viti i kaluar dhe pacientët e paraqitur këtë katër mujor.