Isa Mustafa në Kuvend. Foto: Atdhe Mulla.
2 vite prej rënies së Qeverisë Mustafa
Sot janë bërë 2 vite prej rënies së Qeverisë së Isa Mustafës, më 10 maj 2017.
Ish kryeministri Isa Mustafa u shkarkuara me votat e partnerëve të koalicionit, Partisë Demokratike të Kosovës.
Koalicioni i madh i asaj kohe, LDK dhe PDK kishte zgjatur për 2 vite e gjysmë, derisa PDK-ja vendosi ta ndërpres bashkëpunimin duke votuar mocionin e Nismës për Kosovën për të rrëzuar Qeverinë e Kosovës.
78 deputetë të Kuvendit të Kosovës kishin votuar për rrëzimin e Qeverisë, 34 kishin votuar kundër, ndërsa 3 deputetë kishin abstenuar.
Po atë ditë, presidenti Hashim Thaçi kishte shpërbërë Kuvendin dhe kishte shpallur zgjedhjet e reja, të cilat u mbajtën më 11 qershor të 2017, ku fitues kishte dalë koalicioni PAN, me PDK, AAK dhe Nisman.
“Kam qenë i vetëdijshëm se PDK dhe klientela e korruptuar nuk e përballon këtë”, kishte shkruar Isa Mustafa në atë kohë.
Isa Mustafa ishte zgjedhur kryeministër i Kosovës me 9 dhjetor të vitit 2014 me 73 vota pro, 38 kundër dhe 2 abstenime.
Ai ishte zgjedhur kryeministër pas një ngërçi politik mbi 6 mujorë në Kosovë. LDK kishte “tradhtuar” bllokun opozitar të asaj kohe, me Vetëvendosjen, AAK dhe Nismën për të lidhur koalicion me PDK.
Ky bashkërendim kishte zgjatur 6 muaj, derisa Isa Mustafa nënshkroi marrëveshje bashkëpunimi me Hashim Thaçin.
Marrëveshja e 2014 në mes të LDK-së dhe PDK-së, e kishte bërë president Hashim Thaçin në shkurt të 2016.
1 vit më vonë, ish partia e Hashim Thaçit do të votonte për shkarkimin e Qeverisë së Isa Mustafës.
https://kallxo.com/gjnk/rezultatet-dhe-te-metat-e-bashkeqeverisjes-900-ditore/
Këtu mund t’i gjeni votat e deputetëve të legjislaturës së kaluar që çuan në rrëzimin e Qeverisë së Isa Mustafës.
Zgjedhjet e Qershorit e nxorën kryeministër Ramush Haradinajn. Ky është duke qeverisur me vendin që nga shtatori i vitit 2017.