Pamje nga prezantimi i raportit të Zyrës së BE-ë rreth informalitetit në Kosovë - Foto: Facebook
Zyra e BE-së Publikon Raportin që Tregon Vatrat e Informalitetit në Kosovë
Shefja e Zyrës së BE-së në Kosovë Nataliya Apostolova theksoi sot se nuk mjafton luftimi i informalitetit vetëm në reforma në administratë.
Në prezantimin e raportit të hartuar nga Zyra e Bashkimit Europian rreth shtrirjes së në Kosovë, Apostolova tha se reformat duhet të shtrihen edhe në gjyqësor, në mënyrë që të bëhet më shumë në konfiskimin e pasurive të fituara përmes rrugëve të paligjshme.
“Luftimi i ekonomisë joformale është çështje me rëndësi për BE-në dhe është vështirë ta luftosh një armik pa e gjetur shkakun, andaj jemi përkushtuar përmes raportit të gjejmë shkaktarët për luftimin e kësaj dukurie”, theksoi ajo.
Përfaqësuesja speciale e BE-së tha po ashtu se ka një zvogëlim të ekonomisë joformale në Kosovë dhe kjo është për shkak të reformave të marra nga Ministria e Financave, gjegjësisht nga Dogana dhe ATK-ja.
Por, sipas saj, për luftimin e ekonomisë së zezë dhe joformale nuk mjaftojnë vetëm reformat e administratës. “Ne presim nga Qeveria e Kosovës zbatimin e ligjit dhe forcimin e gjyqësorit përmes konfiskimit t’u shkaktojmë dhimbje atyre që i paraprijnë kësaj dukurie”, tha Apostolova.
Raporti i vlerësimit mbi shtrirjen e ekonomisë joformale në Kosovë ka për qëllim mbështetjen e mëtejshme të institucioneve të Kosovës kundër krimit të organizuar, korrupsionit dhe ekstremizmit të dhunshëm. Raporti paraqet një pasqyrë të gjendjes ekonomike të vendit dhe është i fokusuar në fushat e caktuara ku ka ngecje dhe nuk ka progres.
Sipas raportit, Marrëveshja e Stabilizim Asocimit, ka sjellë efekte pozitive në rritjen e investimeve dhe konsumit, ndërsa shërbimet e ndërtimit shihen si shtytës madhorë të rritjes.
Deficitet tregtare të Kosovës sipas raportit janë financuar nga investimet e huaja direkte dhe remitancave të larta nga diaspora (më shumë se 600 milionë euro në vit) dhe njëherit llogariten si linjat më të mëdha financuese për bilancin e pagesave të vendit me botën.
Borxhi publik sipas raportit po ashtu është në trend pozitiv, duke mos e kaluar pragun e artë pozitiv prej 45% për vendet në zhvillim.
Edhe përshkallëzimi i TVSH-së ka sjellë efekte pozitive në vend, nga 16% në dy norma 8% për mallrat elementare dhe 18% për mallrat e tjera. ky përshkallëzim në vitin 2015 e ka çuar vendin në një shkallë më të lartë të Bruto Produktit Vendor për tatimet direkte.
Një element që tregon nivelin e varfërisë në Kosovë sipas raportit është shkalla e papunësisë, e cila ishte rritur në 28% në vitin 2016 krahasuar me vitin 2015 që ishte 25.2%.
Por duke e krahasuar punësimin me rritjen e investimeve që kishin ndodhur në vitin 2016 sipas raportit shihet se formalizmi i ekonomisë kishte pasur një rritje më të madhe në vitin 2015.
Pavarësisht zvogëlimit të ekonomisë joformale për periudhat 2013-2015, sipas raportit, në terren shumica e veprimtarisë së ekonomisë së zezë ka mbetur në masë të madhe e pranishme.
Për të arritur tek informacioni Zyra e BE-së ka përdorur informacionet që gjenden në pagesën e tatimeve, si tatimet nga të ardhurat personale, tatimet nga qiraja, interesi dhe fitimi si dhe tatimet nga konsumi.
Nisur nga perspektiva e punësimit raporti pasqyron gjendjen e terrenit duke vlerësuar se 45 mijë punëtorë punojnë me orar të plotë në sektorin joformal ku 11 deri në 15% janë në sektorin e bujqësisë, e pasuar nga sektori i ndërtimtarisë dhe në fund veprimtaritë tregtare.
Sipas llogaritjeve del se Kosova ka humbje prej 60.1 milionë euro në vit nga mospagesa e Tatimit në të ardhura personale dhe tatimi në të ardhura të korporatave.
Duke e ditur se shumica e bizneseve të vogla dhe të mesme në Kosovë janë biznese familjare, sipas raportit kjo situatë tregon se 33.2% e të ardhurave personale për ekonomitë familjare janë joformale.
Këtë shifër e dëshmon fakti se e ardhura totale sipas konsumit nuk përputhet me asnjë burim të njohur të ligjshëm dhe ka gjasë se kjo e ardhur të jetë krijuar nga veprimtaritë që mbahen të fshehura në mënyrë të përhershme.
Zyra e BE-së gjatë krahasimit të normës faktike të kthimit në asete i ka identifikuar disa pika të nxehta që tregojnë se cilat aktivitete ekonomike kanë norma të larta të fitimit e ato janë ndërtimtaria, patundshmëria, veprimtaritë profesionale, tregtia dhe shërbimet hoteliere.
Normat e larta të kthimit në asete në krahasim me normat e ulëta të shitjes që këto veprimtari kanë sipas raportit nuk përkojnë me tiparet globale dhe rajonale për të njëjta aktivitete të vlerësuara mbi bazën e teorisë së çmimit të aseteve.
Sipas sektorëve, pikat e nxehta ku ka informalitet në raport paraqitet sektori i bujqësisë, sektori i ndërtimtarisë, sektori i shitjeve me shumicë dhe pakicë, sektori i patundshmërive, sektori i veprimtarive financiare dhe sektori i sigurimeve dhe shërbimeve profesionale.
Bujqësia si aktivitet kryesor në Kosovë karakterizohet me numrin e lartë të fermave të vogla me më pak se 2 hektarë, me një sipërfaqe prej 70% tokë e punueshme.
Sipas të gjeturave në raport te ky sektor ka pagesa minimale të pagesave në të ardhura personale dhe në të ardhura të korporatave (jo më shumë se 2 milionë euro në vit), përderisa të ardhurat nga konsumi për këtë kategori janë të larta.
Sektori i ndërtimtarë sipas raportit radhitet ndër sektorët me normat më të larta të kthimit të aseteve.
Periudha e kthimit të aseteve në Kosovë është më e shkurtër se 3 vite, e ky numër është së paku 2 herë më i lartë se trendi global dhe ai i BE-së. Një mospërputhje e habitshme për financimin e ndërtimit sipas llogaritjeve të paraqitura në raport është niveli i ulët i kreditimit të këtij sektori e kjo sugjeron praninë e mjeteve alternative të financimit të aktivitetit ekonomik.
Shitja e ndërtesave banesore ose shitje në këmbim të truallit sipas raportit tregon se ato paguhen sipas gjetjeve vetanake duke e anashkaluar sektorin financiar, e kjo tregon se nuk mund të parandalohen fitimet nga aktiviteti i paligjshëm që hyjnë në sektor përmes skemave të njohura të derës së pasme.
Gjithashtu në këtë sektor numri i punëtorëve joformalë është 9 mijë e 778 me një humbje prej 3.2 milionë euro në të ardhura personale dhe 5.2 milionë euro në të ardhura të korporatave që informaliteti i bie të jetë 4 herë më i lartë se në sektorin e bujqësisë.
Sektori me shumicë dhe pakicë sipas raportit po ashtu është vatër e informalitetit, duke e rritur nivelin e kredive në mënyrë që të tejkalojnë pamjaftueshmërinë e mjeteve financiare për t’i përmbushur detyrimet tatimore.
Aktivitetet tregtare sipas raportit të BE-së përdoren si “derë e pasme” për të financuar aktivitet e tjera ekonomike dhe sipas skemave të hulumtuara në sektorin e ndërtimtarisë, prania e aktivitetit të pastrimit të parasë duhet të jetë shumë e mundshme.
Gjithashtu edhe mbledhja e tatimit në qira sipas raportit është shumë e dobët. Tatimet e kësaj kategorie nuk paguhen as nga individët as nga kategoritë e tjera,
ATK-ja nuk mban shënime korrekte për këtë kategori të tatimit.
Gjatë publikimit të raportit një vlerësim të tillë për sektorin e ndërtimit nuk e pëlqeu ministri i Financave, Bedri Hamza, i cili tha se nuk mund të vlerësohet sektori i ndërtimtarisë si sektor problematik sepse shumë nga diaspora blejnë banim në Kosovë.
“Siç po shihet në raport ju e keni theksuar se ka të hyra nga remitanca por nuk e keni vlerësuar se shumë njerëz që blejnë banim në Kosovë janë nga diaspora dhe pagesën e bëjnë me para të gatshme andaj vlerësimi për këtë sektor nuk mund të jetë i saktë” tha Hamza.
Por, i shpejtë në përgjigje ishte eksperti nga Zyra e BE-së Antonio Braho i cili e prezantoi raportin, duke theksuar se sipas të dhënave, kthimi i investimit brenda 3 viteve për një ndërtesë nënkupton që për t’i blerë ato duhet pasur 10 mijë euro pagë mujore.
“Ne i kemi paraqitur shumë qartë të dhënat në raport nëse një investim i llojit ndërtim i lartë kthehet brenda 3 viteve kjo do të thotë se ato janë shitur të gjitha, e për të paguar një banesë brenda 3 viteve nënkupton se një kosovar duhet ta ketë pagën 10 mijë euro në muaj” tha Braho.
Edhe shefja e BE-së Nataliya Apostolova gjatë prezantimit të raportit porositi Qeverinë se nuk mjafton luftimi i informalitetit vetëm me reforma në administratë.
Sipas saj, reformat duhet të shtrihen edhe në gjyqësor në mënyrë që të bëhet më shumë në konfiskimin e pasurive të fituara përmes rrugëve të paligjshme.
http://kallxo.com/kerkon-reforma-ne-gjyqesor-per-ta-luftuar-informalitetin/
Rekomandimet për Qeverinë e Kosovës përmes raportit ishin promovimi i një sistemi të drejtë tatimor, niveli i kthimeve të investimeve në bujqësi duhet të jenë në përputhje me nivelet e përgjithshme globale dhe të BE-së.
Gjithashtu duhet të bëhet vlerësimi sektorial për rrezikun e pastrimit të parave në ndërtimtari, patundshmëri dhe tregti me shumicë e pakicë.
Projekti i prezantuar sot është hartuar dhe financuar nga BE-ja. Ai ka për qëllim mbështetjen e mëtejmë për institucionet e Kosovës në luftën kundër krimit të organizuar, korrupsionit dhe ekstremizmit të dhunshëm.