Objekti i Komunës së Mitrovicës | Foto: KALLXO.com
Vritet një Person në Mitrovicë
Këtë e ka konfirmuar për KALLXO.com, zyrtari për Informim i Policisë së Kosovës për rajonin e Mitrovicës, Avni Zahiti.
“Sipas informacioneve fillestare që kam, incidenti ka ndodhur para 45 minutave në Rrugën e UÇK-së në Mitrovicë ku si pasojë e të shtënave me armë zjarri një person tashmë i konfirmuar nga mjeku ka mbetur pa shenja jete në vendin e ngjarjes”, deklaroi Zahiti.
Ai tha se nuk dihet motivi i kësaj vrasjeje, ndërsa tregoi se Policia e Kosovës është duke u munduar të identifikojë personat e dyshuar të këtij rasti.
“Nuk dihet motivi dhe është duke u punuar drejt identifikimit të të dyshuarve dhe ende nuk mund te jap diçka më shumë”, tha Zahiti.
Zyrtari i Policisë së Kosovës në Mitrovicë, tregoi se ngjarja ka ndodhur në afërsi të gjimnazit “Frang Bardhi” të këtij qyteti, por nuk dha detaje nëse i vrari është nxënës i kësaj shkolle.
“Në afërsi të shkollës ka ndodhur, por jashtë hapësirave të saja. Sa i përket viktimës nuk mund ta konfirmoj tash për tash sepse është çështje e procesit në rrjedhje të mëtutjeshme se si do të zhvillohet në vend të ngjarjes,” pohoi Zahiti.