Pamje nga seanca e sotme e gjykimit për vrasjen e Mentor Zekajt - Foto: KALLXO.com
Vëllai i Viktimës Dëshmoi në Gjykimin për Vrasjen në Pejë
Driton Zekaj ka ardhur nga Zvicra për të dëshmuar në Gjykatën e Pejës në gjykimin për vrasjen e vëllait të tij, Mentorit, për çka po gjykohet ish-shoku i tashmë të ndjerit, Kreshnik Haliti.
Dëshmitari rrëfeu para trupit gjykues se me të akuzuarin ishte takuar disa herë para se të ndodhte rasti tragjik. Për të tha se e njihte për shok të mirë të vëllait të tij.
Dëshmitari Zekaj tregoi se pasi kishin arritur nënshkrimin e kontratës për blerjen e një shtëpie në Pejë në vitin 2016, bashkë me vëllai e tij, Mentorin, kishin organizuar një festë në lokalin e tij.
Në këtë aheng dëshmitari tha se vëllai i tij kishte ftuar 5-6 shokë të ngushtë, në mesin e të cilëve ishte edhe tashmë i akuzuari Kreshnik Haliti.
Sipas tij, në atë kohë kishte ardhur nga Zvicra për t’i sjellë 120 mijë euro për pagesën e shtëpisë së blerë.
Sipas rrëfimit të tij, disa ditë pasi kishte shkuar sërish në Zvicër, vëllai i tij, Mentori, i kishte telefonuar dhe i kishte thënë se shoku i tij, Kreshniku, po ia kërkon disa para borxh, sepse është i kërcënuar.
“I thash (Mentorit): çfarë arsye ka ai që po i lyp paret? Më tha: O burrë u zatet, se po e kërcënojnë njerëzit për borxh, po e kërcënojnë me familje. I thash: koka puna keq, por ti e din që shtëpinë kemi me pagu në mars. Ai tha se do bëjnë marrëveshje me të (me Kreshnik Halitin), e tha se paret i kthen me 1 mars”, tha dëshmitari Zekaj.
Tutje ai tha se me këtë borxh asnjëherë nuk ishte marrë, derisa tregoi edhe për bisedën e fundit që kishte me vëllain e tij përmes telefonit në ditën kritike.
“Paradite kam biseduar me telefon me Mentorin. Më ka thënë: pasdite i sjell paret e borxhit (Kreshnik Haliti)”, tha ai.
Pas vrasjes së vëllait, ai tha se te paratë e dedikuara për pagesën për shtëpinë kanë qenë vetëm 34 mijë euro, ndërsa ai tha se pretendon se 86 mijë euro vëllai i tij i ndjerë ia kishte dhënë borxh Kreshnik Halitit.
Për këtë të fundit tha se vrasjen e kishte bërë vetëm për ta zhdukur borxhin.
Por kur i erdhi radha të parashtrojë pyetje, i akuzuari Kreshnik Haliti tha se “po fabrikohen disa raste të paqena”.
“Nga ajo që po thuhet këtu, po del që asnjë pagesë e asnjë kësti të shtëpisë, për këtë propozoi dëshmitar pronarin e shtëpisë, sepse këtu i nderuar trup gjykues po fabrikohen disa gjëra aspak të vërteta. Me të vërtetë ndjej keqardhje për familjen, por janë duke u fabrikuar disa të pavërteta”, tha i akuzuari.
Pasditen e 6 marsit të vitit të kaluar, Mentor Zekaj mbeti i vrarë nga të shtënat me armë zjarri në lagjen “Fidanishte” të Pejës.
Në këtë proces gjyqësor Kreshnik Haliti akuzohet për vrasje të rëndë të Mentor Zekajt.