Ukë Rugova në Gjyq për Vizat
Shtyrja është bërë ngase në seancë kanë munguar pesë të akuzuar.
Mungesa e pesë të akuzuarve paraqiti dilema se a duhet të ndahet procedura ndaj tyre, apo të shtyhet seanca.
Disa nga avokatët propozuan ndarje të procedurës, e disa të tjerë shtyrje të seancës.
Gjykata vendosi ta shtyjë seancën për shkak të mungesës së pesë të akuzuarve.
Seanca ndaj Ukë Rugovës dhe 18 të akuzuarve tjerë është përballur që në fillim me probleme me rrymë.
Rryma është ndalur sapo seanca ka filluar.
09:19
Sot në Gjykatën Themelore në Prishtinë është paraparë nisja e seancave fillestare kundër Ukë Rugovës dhe 18 personave tjerë.
Gjykimi lidhet me lëshimin e vizave italiane shengen në këmbim të marrjes së parave nga të interesuarit.
Sipas aktakuzës se Prokurorisë Speciale të Kosovës, nga maji 2011 deri më shkurt 2014, djali i ish-presidentit historik të Kosovës, Ukë Rugova ishte drejtues i një grupi kriminal i cili në këmbim të një shume prej 3000-4000 mijë euro siguroi 556 viza shengen për 526 persona të ndryshëm nga gjithsej 614 aplikacione për vizë sa ishin bërë në ambasadën italiane në Kosovë.
Po ashtu sipas prokurorisë, këto viza ishin afatshkurtra për turizëm 30 ditor dhe të vlefshme për 6 muaj.
38 aplikacione për vizë shengen italiane janë gjetur edhe në bastisjen në vendbanimin e Ukë Rugovës të urdhëruara nga prokurori i EULEX-it.
Sipas prokurorisë, qëllimi i këtij grupi ka qenë të sigurojë përfitim material duke furnizuar individë me viza shengen nga ambasada italiane në Prishtinë, viza të cilat janë marrë në mënyrë të paligjshme përmes shtrembërimit dhe korrupsionit.
Sipas aktakuzës së prokurorit Cansick, Prokuroria Speciale e Kosovës ka pranuar nga Prokuroria Italiane në Romë një kopje të dosjes së tyre lidhur me këto viza ku ndër të tjera përfshihet edhe emri i ish-ambasadorit italian në Kosovë, MIchael Giffoni, zyrtarit administrativ, Fawzi Habbib si dhe punonjësit lokal të ambasadës italiane në Kosovë, Florian Petani.
Në periudhën për të cilën akuzohet, Ukë Rugova ka qenë deputet i Kuvendit të Kosovës, i zgjedhur në listën e kandidatëve për deputetë të AAK-së, ndërsa më vonë u bë pjesë e grupit parlamentar të AKR-së.
Së bashku më Ukë Rugovën në këtë rast janë të akuzuar edhe Izet Beqiri, Florjan Petani, Qefser Baholli, Astrit Haraqija, Fitim Beqiri, Azad Beqiraj, Liridona Beqiri, Kujtim Avdyli, Ragip Gashi, Visar Beqiri, Hamza Beqiri, Azem Koskoviku, Edison Idrizaj, Beg Shaqiri, Hasan Shaqiri, Driton Voca, Valon Selimi dhe Fadil Ahmeti.
Shkrimet e KALLXO.com për aktakuzën ndaj Ukë Rugovës mund t’i lexoni këtu.
