Tetë të Arrestuar për Prostitucion

Policia e Kosovës, Drejtoria për Hetimin e Trafikimit me Qenie Njerëzore, ka njoftuar se ka arrestuar tetë perona të cilët dyshohen për  përfshirje në vepra penale ‘mundësim në prostitucion dhe ofrim i lokaleve për prostitucion, veprën kundërvajtëse ‘marrje me prostitucion’.

Në njoftimin e Policisë thuhet se pas punëve hetimore që kanë zgjatur për disa javë, operacioni është përfunduar me  sukses.

“Operacione policore janë realizuar nëpër rajone të ndryshme, si në Prishtinë, Ferizaj, Mitrovicë etj., ku si rezultat janë arrestuar tetë (8) persona të dyshuar të përfshirë në veprën penale ‘mundësim në prostitucion dhe ofrim i lokaleve për prostitucion, veprën kundërvajtëse ‘marrje me prostitucion’ si dhe janë konfiskuar dëshmi materiale që mund të përdoren për procedim ligjor”, thuhet në njoftimin e Policisë.

Sipas Policisë, këto veprime të kundërligjshme edhe si dukuri, përpos dëmtimit të imazhit të vendit, shtimit të pasigurisë në shoqëri, rritjes së problemeve familjare,  ndikojnë edhe në shëndetin e qytetarëve, pasi që Policia gjatë zbatimit  të operacioneve ka hasur edhe persona që kanë ushtruar veprimtarinë e ‘marrjes me prostitucion dhe që kanë qenë të infektuar me  sëmundje të ndryshme.

“Andaj, u bëhet apel qytetarëve që t’iu shmangen veprimeve të tilla dhe për çdo rast të dyshuar të njoftojnë Policinë në mënyrë që organet kompetente të ndërmarrin masa parandaluese”, thuhet në njoftimin e Policisë së Kosovës.