Presidentja kroate, Kolinda Grabar Kitaroviq dhe homologu i saj serb, Aleksandar Vuçiq - Foto: Rtv21

A do të Kërkojë Kroacia Dëmshpërblim nga Serbia Gjatë Vizitës së Vuçiqit

Presidenti i Serbisë Aleksandar Vuçiq pritet ta vizitojë të hënën e të martën Kroacinë.

Kryeministri kroat, Andrej Plenkoviq ka përmendur mundësinë që gjatë kësaj vizite nga Vuçiq të kërkohet dëmshpërblim për krimet e luftës.

Mirëpo, duket se jo të gjithë në Kroaci janë të këtij mendimi.

Ish-ministri kroat, Fred Matiq e sheh si të pakuptimtë këtë propozim.

“Nëse ne kërkojmë dëmshpërblim për krimet e kryera në vitet e 90’ta në Kroaci nga serbët, atëherë ata do të kërkojnë dëmshpërblim për Luftën e Dytë Botërore, pastaj ne do të kërkonim për Luftën e Parë Botërore”, tha Matiq për N1.

Ai ndër tjerash thotë që Vuçiq nuk do të pritet me protesta në Kroaci.

“Nëse kisha dhe partitë kryesore nuk e përkrahin protestën, atëherë ajo as që do të vërehej. Do të ishte sikur: Ne protestuam, por ai erdhi”, shprehet tutje ish-ministri kroat.

Ai beson që vizita e Vuçiqit nuk do të zgjidhë asgjë dhe përderisa presidenti serb do të duhej të dërgonte të dhëna për personat e zhdukur,

Matiq nuk beson se një gjë e tillë do të ndodhë nga ana e Vuçiqit.

Vuçiq viziton Kroacinë me ftesë të presidentes kroate,  Kolinda Grabar-Kitaroviq, ku pritet të takojë edhe kryeministrin e vendit, si dhe përfaqësues të kishës ortodokse në Zagreb. /21Media