Ndarja e kufijve sipas Marrëveshjes së Demarkacionit është ende e paqartë për publikun | Foto: përpunim mbi Google Maps
Takimi i 3 Gushtit, Formal
Nga tryeza e 3 gushtit që do të mbahet në ambientet e Kuvendit të Kosovës, ku do të diskutohet për demarkacionin, opozita pret dy gjëra: se me faktet që do të ofrohen deputetët e pozitës do të binden për dëmet që i shkakton Marrëveshja, dhe se Qeveria nuk do t’i marrë parasysh faktet që do të paraqiten.
Ndonëse e konsideron të vonuar, Pal Lekaj thotë se AAK e vlerëson takimin ku do të ballafaqohen faktet rreth kufirit me Malin e Zi.
Kryetari i grupit parlamentarë të AAK-së pret që nga ky takim të binden deputetët e pozitës se Marrëveshja cenon integritetin territorial të Kosovës.
Lekaj akuzon Qeverinë se po kontakton Komisionin e Malit të Zi për të siguruar përgjigje rreth secilës dilemë që do të ngrejë opozita dhe pjesëmarrësit e tjerë të takimit, zhvillimin e të cilit e kishte kërkuar deputeti nga radhët e LDK-së, Shpejtim Bulliqi, e që ishte përkrahur edhe nga deputetë të dy taborëve.
“Ma e keqja është që kemi informacione se disa nga argumentet (materiale shkencore e hartografike) janë zhdukur kohëve të fundit… Dhe se dikush nga Qeveria e Komisioni janë përgatitur, janë shërbyer nga Komisioni i Malit të Zi, për të pasur përgjigje për secilën dilemë që e kemi ngritur ne. Kjo është për të ardhur keq se si Komisioni, i cili është i thirrur për të mbrojtur tokat e vendit të vet, i “ndihmon” dikujt tjetër. Ky është absurd i llojit të vet”, është përgjigjur Lekaj në një përgjigje dërguar për KALLXO.com.
Ndërsa nga Lëvizja Vetëvendosje thonë që nuk presin që Qeveria t’i marrë parasysh këto fakte andaj janë duke u përgatitur për një rezistencë intensive.
“Ne nuk presim që Qeveria dhe kryetari i Kuvendit do t’i marrin parasysh faktet që do të prezantohen në këtë tryezë. Prandaj jemi duke u përgatitur se në rast se nuk ndryshohet kjo Marrëveshje, të zhvillojmë rezistencë shume intensive”, thotë partia më e madhe opozitare në pyetjen në lidhje me pritjet nga takimi i 3 gushtit, ku do të diskutojnë zyrtarë të Qeverisë, deputetë, zyrtarë të Komisionit Shtetëror dhe ekspertë.
Ndërsa analisti, Petrit Zogaj, këtë takim e cilëson si “formal”.
“Takimi është formal. Po bëhet për qëllime të opinionit publik. Asnjëra palë nuk do t’i pranojë faktet e tjetrës. Lufta politike do të vazhdojë njëjtë sikurse edhe para 3 gushtit”, tha Zogaj për KALLXO.com.
Takimi është paraparë të mbahet me 3 gusht në objektin e Kuvendit të Kosovës, mirëpo ende nuk është vendosur për detajet.
