Supremja Kthen në Pikën Zero Rastin Medikus

Një mjet i jashtëzakonshëm juridik i ushtruar nga avokatët mbrojtës kundër dy vendimeve dënuese të gjykatës themelore dhe asaj të apelit, e ka kthyer në pikën fillestare Rastin “Medikus”, kur kanë kaluar më shumë se tre vjet nga dënimet e shumicës së të akuzuarve.

Ndonëse ishin dënuar nga Gjykata Themelore dhe Gjykata e Apelit u kishte vërtetuar dënimet,  babë e bir, Lutfi e Arban Dervishi, asnjëherë nuk u paraqitën për vuajtjen e dënimit, ndërsa ndaj tyre u lëshua edhe fletrreshtim.

Megjithatë, tani Gjykata Supreme e Kosovës ka vendosur që rasti të kthehet në rigjykim.

Lajmin për KALLXO.com e konfirmoi Petrit Dushi, avokati i Arban Dervishit.

“Gjykata Supreme e ka kthyer në rigjykim pjesën dërrmuese të rastit. Mbetet e paprekur vetëm pjesa e ushtrimit të kundërligjshëm të veprimtarisë mjekësore, pikë të cilën nuk e ka i mbrojturi im Arbani, por vetëm Lutfiu dhe eventualisht Sokoli,” tha Dushi.

Dushi tha se dy pikat më të rënda të akuzës, ajo e krimit të organizuar dhe ajo e trafikimit me qenie njerëzore janë kthyer në rigjykim.

Avokati Dushi nuk ishte në gjendje që të tregojë arsyet që Gjykata Supreme e Kosovës ka vendosur në këtë formë, pasi që tha se vendimin e ka pranuar gjatë ditës së sotme dhe ende nuk e ka analizuar në tërësi. Megjithatë ai tha se vendimi i Supremes ka ardhur si pasojë e mjetit juridik tëjashtëzakonshëm-kërkesës për mbrojte të ligjshmërisë së ushtruar nga ai.

Urologu Lutfi Dervishi ishte dënuar në vitin 2013 me 8 vjet burg nga Gjykata Themelore e Prishtinës nën akuzën për krim të organizuar dhe trafikim me qenie njerëzore, ndërsa këtë vendim ia vërtetoi në vitin 2016 edhe Gjykata e Apelit.

Djalit të Lutfiut, Arbanit, i cili nga gjykata themelore ishte dënuar me 7 vjet e tre muaj burg, Gjykata e Apelit ia ngriti dënimin në 8 vjet, ndërsa Sokol Hajdini nga Gjykata e Apelit u dënua me 5 vjet burg për dallim nga dënimi prej 3 vjetësh që i kishte shqiptuar gjykata themelore.

Dënimet Gjykata Themelore në Prishtinë i shpalli më 29 prill të vitit 2013, ndërsa Gjykata e Apelit lidhur me këtë rast vendosi në mars të këtij viti.

Ndërsa pos dënimit me burg,  urologu Lutfi Dervishit i ishte ndaluar edhe edhe ushtrimi i profesionit të urologut për dy vjet.

Arban Dervishi, menaxher në klinikë, atëherë u dënua për të njëjtat akuza me Lutfi Dervishin me 7 vjet e 3 muaj burg dhe gjobën prej 2 mijë e 500 eurosh.

Sokol Hajdini për lëndime të rënda trupore u dënua me 3 vjet burg dhe ndalim mosushtrimi të profesionit të anesteziologut për një vit.

Po për lëndime të rënda trupore u dënuan me nga një vit burg me kusht edhe Islam Bytyqi e Sylejman Dulla.

Pas arrestimit të mjekut Lutfi Dervishi , të birit të tij dhe anesteziologëve, Policia  e Kosovës kishte bastisur Klinikën “Medicus” ku kishte gjetur medikamente me afat të skaduar dhe doza të gjakut të cilat nuk kishin origjinë.

Në Klinikën “Medicus” ishte gjetur edhe një pacient, shtetas izraelit, i cili dyshohet se kishte pranuar veshkën nga një shtetas turk. Shtetasi turk qe arrestuar në Aeroportin e Prishtinës në kohën kur po largohej nga Kosova.

KALLXO.com në vazhdimësi ka raportuar lidhur me këtë rast ndërsa raportimet mund t’i gjeni në këtu.