Ramush Haradinaj me policinë franceze . Foto: Jean-Francois Badias/BETA.

Shqiptarët e Diasporës Bashkohen për Haradinajn

Shqiptarët në gjithë botën kanë nisur një fushatë protestash pas ndalimit të Ramush Haradinajt në Francë në bazë të një fletarresti ndërkombëtar të lëshuar nga Serbia.

Në shumë qytete të ndryshme kudo në botë janë mbajtur protesta dhe nënshkruar peticione nga anëtarë të diasporës shqiptare, duke bërë thirrje për lirimin e menjëhershëm të Ramush Haradanajt, i cili u ndalua në Francë javën e kaluar në bazë të një urdhërarresti nga Serbia.

NDËRLIDHUR

Protestuesit këmbëngulin se arrestimi i tij nuk ishte i ligjshëm, sepse ish-kryeministri i Kosovës, i cili tani drejton Aleancën për Ardhmërinë e Kosovës, është liruar dy herë nga akuzat nga gjykata e krimeve të luftës në Hagë.

Protestat janë organizuar në Bruksel, Uashington dhe Nju-Jork, si edhe në kryeqytetin e Kosovës, Prishtinë, ndërsa një sërë veprimesh të tjera do të mbahen më 14 janar në Tiranë, Tetovë dhe Prishtinë.

Beogradi pretendon se ish-komandanti i Ushtrisë Çlirimtare të Kosovës kreu krime lufte gjatë konfliktit të viteve 1990 me forcat serbe.

Protestat nga shqiptarët e diasporës para ambasadave të Serbisë dhe misioneve diplomatike në disa vende shkaktuan reagime të ashpra nga Ministri i Jashtëm i Serbisë Ivica Daçiq, i cili hodhi dyshimet se disa protestues po planifikojnë të sulmojnë një mision diplomatik serb.

“Kemi informacion për zaptimin e një prej misioneve tona diplomatike në Shtetet e Bashkuara ose Evropë, gjë e cila po komplotohet nga diaspora shqiptare në mënyrë që ta detyrojë Serbinë të tërheqë kërkesën e saj për të gjykuar Haradinajn”, tha të hënën Daçiq.

Ai tha gjithashtu se Serbia nuk do të heqë dorë nga përpjekjet e saj për ekstradimin e Haradinajt.

Deklarata e tij erdhi disa orë pas protestave në mbështetje të Haradinajt jashtë misioneve franceze në Uashington dhe Dallas, dhe para misionit të përhershëm të Serbisë në OKB, në Nju-Jork.

Protesta në Pejë: Haradinaj e ka Dëshmuar Pafajësinë

Politikanët shqiptarë kanë lobuar gjithashtu për lirimin e Haradinajt.

Pasi kryeministri Edi Rama dhe ministri i Jashtëm Ditmir Bushati e dënuan ndalimin e tij, zëvendëskryetarja  e Parlamentit, Valentina Leskaj, i bëri thirrje të hënën kreut të Këshillit të Evropës në cilësinë e saj si kryetare e delegacionit parlamentar shqiptar në Këshillin e Evropës.

“Ndalimi i Ramush Haradinajt në një vend anëtar të Këshillit të Evropës në bazë të një urdhërarresti të vjetër nga ana e Serbisë është e papritur dhe e papranueshme. Kjo është një shkelje e të drejtave themelore të njeriut”, i shkroi Leskaj shefit Këshillit Evropian Pedro Agramunt.

Në vetë Kosovë, deputetët ditën e martë debatuan një rezolutë parlamentare në lidhje me këtë rast.

Ish-kreu i OSBE-së në Kosovë, William Walker, ishte i pranishëm gjatë seancës parlamentare dhe tha për BIRN se ai besonte se urdhërarresti nga ana e Serbisë ishte i motivuar politikisht.

“Francezët duhet të dinë se ky është një akt politik nga ana e Beogradit. Jam i zemëruar që Serbia i vazhdon ende këto përpjekje, njësoj siç jam edhe me Francën”, tha Walker.

Mediat në Serbi raportuan të martën se Ministria e Drejtësisë në Beograd ka paraqitur një kërkesë zyrtare homologes së saj në Paris për ekstradimin e Haradinajt.

Një gjykatë franceze do të vendosë të mërkurën nëse do ta lirojë apo jo nga paraburgimi politikanin nga Kosova në pritje të një vendimi për kërkesën për ekstradim.

http://kallxo.com/ne-gjakove-kerkohet-lirimi-haradinajt-nga-burgu-francez/

11 Janar 2017 - 18:32

Fatjona Mejdini, BIRN, Tiranë 11/01/2017 - 18:32
NDËRVEPRIMI0

Shqiptarët e Diasporës Bashkohen për Haradinajn

by Kallxo
NA NDIQNI

Send this to a friend