Ndërtesa e Rektoratit të UP-së | Foto: KALLXO.com
Sekretari i UP-së Merret në Pyetje nga Policia
Dëshmia e sekretarit Kelmendi ka filluar në orën 13:00 ndërsa ka përfunduar rreth orës 15:30.
Pas dëshmisë së tij, sekretari Kelmendi nuk tha asnjë fjalë për KALLXO.com por vazhdoi në heshtje rrugën për të dalë nga objekti i policisë ku po intervistohej.
Policia nuk dha detaje për këtë rast, për shkak të ecurisë së hetimeve.
“Lidhur me kërkesën në fjalë, ju njoftojmë se rasti tani është në fazën e hetimeve paraprake dhe konsiderojmë se përgjigjja në pyetjet e parashtruara mund të dëmtojë zhvillimin e hetimeve”, tha Policia në një përgjigje për KALLXO.com.
Javë më parë, hetuesit e Krimeve Ekonomike dhe Korrupsion të Policisë së Kosovës kanë marrë në pyetje edhe rektorin e Universitetit të Prishtinës, Marjan Dema.
KALLXO.com ka raportuar për paraqitjen e rektorit në Polici, i cili ishte intervistuar nga hetuesit për Krime Ekonomike dhe Korrupsion
http://kallxo.com/rektori-marjan-dema-merret-ne-pyetje-nga-hetuesit
Musa Dragusha, avokati i rektorit Marjan Dema kishte thënë për KALLXO.com se rektori dhe zyrtarët e UP-së janë në një proces të hetimit që është duke u zhvilluar nga Policia e Kosovës
“Rektori i Universitetit si dhe zyrtarë të tjerë janë në një proces të hetimit që është duke e zhvilluar njësia e Policisë së Kosovës ndërlidhur me veprën penale, keqpërdorimi i pozitës apo autoritetit zyrtar nga neni 422 dhe cenimi i të drejtave të punësimit dhe papunësisë nga neni 222 i Kodit Penal të Kosovës”, tha Dragusha për KALLXO.com.