Stevan Budaq

Rumania arreston serbin e dyshuar për gjenocid në Kroaci

Duke vepruar bazuar në një urdhër arresti europian, autoritetet rumune arrestuan Stevan Budaq nën dyshimet për gjenocid dhe “akte terroriste” kundër kroatëve dhe hungarezëve në Kroacinë lindore në vitin 1991.

Stevan Budaq, 50 vjeç, u arrestua nga policia kufitare rumune në pikën doganore të portit të Danubit në qytetin lindor të Galatit, kur ai paraqiti të shtunën pasaportën e tij.

Sipas policisë rumune, Budaq u mbajt bazuar në një urdhër arresti europian bazuar në një vendim gjykate nga Osijeku në Kroaci që e dënonte atë për gjenocid dhe “akte terroriste” kundër kroatëve dhe hungarezëve në fshatin Zmajevac në vitet 1991-1995, ndërsa ai ishte pjesë e një grupi të organizuar paraushtarak.

Krimet në Zmajevac u kryen në fund të vitit 1991 nga paraushtarakët serbë, pasi serbët e Kroacisë u rebeluan kundër autoriteteve shtetërore.

Budaq është një shtetas serb që jeton në qytetin e Kikindës pranë kufirit me Rumaninë dhe punonte si një anëtar ekuipazhi në një anije serbe, e cila ishte rrugës për në Ukrainë, tha policia kufitare rumune.

Gjykata e Apelit në Galati lëshoi një urdhër arresti prej 15 ditësh në mënyrë që të shtunën të pajtohet me urdhër arrestin europian të lëshuar nga Kroacia, njoftoi policia rumune në një njoftim për shtyp.

Budaq është aktualisht në paraburgim në policinë e Galatit.

Sipas raportit të OSBE-së për gjykimet e krimeve të luftës nga viti 2007, Gjykata e Lartë Kroate në vitin 2006 rrëzoi vendimin për Budaqin, i cili u dha në mungesë të tij.

Zvonko Kuhariq, zëdhënës i zyrës së avokatit të shtetit në Osijek, tha për BIRN se në gjykatën e qarkut të Osijekut është ngritur një padi për krime lufte kundër civilëve.

BIRN nuk mundi të konfirmonte nëse Budaqi është dënuar apo jo për krimet e dyshuara.