Rrëshqet Dheu në Lagjen e Muhaxherëve, Rrezikohen Shtëpitë

Arsim Gllogu e ka zhvendosur familjen e tij nga shtëpia në Lagjen e Muhaxherëve në Rrugën “Bedri Shala” për shkak të rrëshqitjes së dheut të shkaktuar nga punët që po bëhen në realizim të ndërtimeve të larta.

Ndërtimi i lartë po bëhet nga investitori “Driloni Com”.

Kjo kompani e ka hequr dheun për të mundësuar ndërtimet e bodrumeve.

Heqja e dheut, në bazë të videos së siguruar nga KALLXO.com është bërë deri në themelin e shtëpisë së Gllogut.

Në këtë sipërfaqe pritet të ndërtohet një ndërtesë banesore me afarizëm, me etazhitet 3B+P+13.

Gllogu ka thënë se askush nuk i ka marrë parasysh ankesat e tij për rrezikun që vjen nga ky ndërtim.

“Komuna i ka lejuar me u afru aq afër dhe nuk është dashur të afrohen aq shumë, sepse na ka rreziku shtëpinë tonë. Investitori nuk i ka bërë pilotat në rregull, prandaj janë shemb”, tha Gllogu për KALLXO.com.

Ai thotë se nuk ka siguri që të kthehet për të jetuar në shtëpinë e tij.

“Po na thojnë që mundemi me hy dhe me banu, mirëpo ajo shtëpi më nuk është e banueshme. Ne i kemi zhvendos familjet. I kam thirrë policinë dhe Komunën”, tha Gllogu.

KALLXO.com ka kontaktuar edhe me Dalip Gashin, pronarin e kompanisë “N.P.N Driloni Com” nga Malisheva që është duke e bërë investimin në këtë ndërtim.

Gashi tha se dje ka ndodhur shembja e dheut dhe dëmtimi i pilotëve, mirëpo gjatë ditë kanë arritur të sanojnë dëmin. Gashi thotë se aktualisht është sanuar dëmi dhe nuk ka rrezik për shtëpitë përreth dhe se ndërtimi i ndërtesës afariste do të vazhdojë.

“Është evitu rreziku, gjendja është e mirë. Në vendin e ngjarjes kanë qenë inspektorati dhe emergjenca. Pas rrëshqitjes së dheut duhet me ju përgjigj situatës që me kthy në gjendjen e mëparshme. Nuk ka pasur arsye me ndalu punën, ata munden me e ndalu, mirëpo nuk i ndihmojë situatës”, tha Gashi.

Sali Zyba, kryeinspektori komunal i Prishtinës e ka konfirmuar për KALLXO.com rrëshqitjen e dheut në Lagjen e Muhaxherëve.

Zyba tregoi se inspektoriati ka dalë në vendin e ngjarjes dhe ka konstatuar se ka rrëshqitje të pjesshme të dheut. Tha se investitori ka intervenuar dhe është sanuar dëmi.

“Ka pasur rrëshqitje të pjesshme të dheut, e ka vizitu inspektori dhe e kemi thirrur policinë, nuk është konstatuar që është rrezik i përgjithshëm… Janë marrë nga inspektori dhe është stopuar përkohësisht puna. Menjëherë janë marrë masa dhe është shmangur rreziku, është mbushur ajo pjesë që ka rrëshqitur dhe ata besoj që e vazhdojnë punën prej të hënës”, tha Zyba.

Zyba konstatoi se inspektorati nuk ka vërejtje në mënyrën e punëve që janë bërë nga investitori në ndërtim të kësaj ndërtese.

“Nuk është e kontestueshme as leja, e as mënyra e punës nga investitori”, tha Zyba.

Ai deklaroi se kjo rrëshqitje nuk përbën rrezik të përgjithshëm për banorët përreth.

“I kemi thirrë policinë, nuk është konstatuar që është rrezik, prandaj kemi vazhdu”, tha Zyba.