Rrëfimi për Tmerrin e Përjetuar nga Grabitësi

Viktima një grabitjeje në Prishtinë, rrëfeu në gjykatë tmerrin e përjetuar në ditën e 27 janarit të këtij viti.

Milaim Canolli akuzohet për grabitjen e gruas të cilën e kishte goditur disa herë për ti marrë çantën.

“Mos livrit, mos bërtit, lësho çantën dhe ami paret”, ishin fjalët të cilat deshmitarja thotë se ia tha i akuzuari pasi i vendosi thikën në fyt.

Sipas viktimës, ngjarja kishte ndodhur gjatë kohës që ajo ishte duke u kthyer në shtëpi, ku edhe kishte dëgjuar disa hapa nga mbrapa në drejtim të saj.

“Më ka vendosur dorën e majtë mbi supë, ma ka mbyllur gojën dhe hundën me të njëjtën dorë, ndërsa me dorën e djathtë ma ka vu tehin e thikës në fyt”, tha viktima në dëshminë e saj.

Më tej, dëshmitarja tregoi se tehu kishte qenë rreth 10-15 cm dhe e tërë thika ka qenë nga metali.

Përkundër goditjeve, viktima tha se kishte arritur ti rezistojë për rreth 15 minutave Canollit, duke mos e lëshuar çantën deri sa goditja e fundit në kokë me pjesën e pasme të thikës, kishte bërë që ajo të humbiste fuqinë dhe të e lëshonte çantën.

Me propozimin e prokurorit Ilaz Beqiri, trupi gjykues e lejoi që e dëmtuara të kthehej nga ana e të akuzuarit dhe ta identifikojë atë.

Më t’u kthyer, e dëmtuara deklaroi: “Ky person është 100% personi i njëjtë që më ka sulmuar më 27 janar”.

Aktakuza ngarkon Milaim Canollin se më 27 janar të këtij viti në orën 16:12 në Prishtinë në rrugën “Azem Bejta”, me qëllim që vetes t’i sjellë përfitim pasuror në mënyrë të kundërligjshme duke përdorur dhunën dhe kanosjen, e duke sulmuar jetën apo trupin e të dëmtuarës nën kërcënimin e thikës me njërën dorë, ndrsa me tjetrën duke mbajtur viktimën, i ka grabitur të dëmtuarës çantën nga krahu i djathtë.

Në çantë, sipas prokurorisë, gjendeshin portofoli me 125 euro dhe një telefon celular i tipit Iphone 7.

Më tej në aktakuzë precizohet se në momentin kur viktima ishte kthyer kah ai dhe ia kishte zbuluar fytyrën, i akuzuari ishte bërë agresiv dhe për këtë disa herë e kishte goditur viktimën gjersa e njëjta kishte rënë në tokë ku e kishte lënduar gjurin.

I akuzuari kishte arritur të largohej prej aty dhe gjësendet ia kishte marrë, kurse çantën ia kishte hedhur në tokë dhe më pastaj është larguar nga vendi i ngjarjes në drejtim të paditur.

Më vonë, Canolli ishte arrestuar nga policia dhe ishte identifikuar nga viktima përmes procedurës standarde të verifikimit në mesin e personave tjerë.