Qeveria Haradinaj, 8 Milionë Euro në Rrugë në Deçan

Gjatë vizitës që i bëri Komunës së Deçanit, Ministri i Infrastrukturës, Pal Lekaj, tha se brenda pak kohësh do fillojnë punimet në segmentin rrugor Deçan-Plavë.

NDËRLIDHUR

Lekaj sot nënshkroi marrëveshje bashkëpunimi me Kryetarin e Komunës së Deçanit, Bashkim Ramosajn, për mbështetjen e disa projekteve infrastrukturore në vlerë prej 8 milionë euro në ketë komunë.

Pas takimit tha se lajm tjetër i mirë për deçanasit është se brenda pak ditëve do nënshkruhet kontrata për fillimin e punës në segmentin rrugor Deçan-Plavë, rrugë e cila e lidh Kosovën me Malin e Zi.

“Ajo që mund të japi një lajm të mirë për Deçanin, është edhe rruga që do të fillojë brenda 10 dite, Deçan-Plavë, që mendoj është një segment i rëndësishëm i lidhjeve të korridoreve, i lidhjeve të dy hapësirave shqiptare, por edhe dy shteteve, shtetit të Kosovës dhe Malit të Zi, por që ka impakt edhe zhvillimin e turizmit. Për Deçanin po vinë ditë të mira”, tha Lekaj.

I pyetur nga KALLXO.com, ministri Lekaj tha se nënshkrimi i kontratës me operatorin ekonomik është çështje ditësh, ndërsa theksoi se për segmentin e parë të kësaj rruge do ndahen 8 milionë euro.

Ministri i Infrastrukturës tutje bëri të ditur se punimet pritet të fillojnë në momentin kur krijohen kushtet të përshtatshme atmosferike.

Me marrëveshjen e nënshkruar sot mes ministrisë dhe komunës, kryetari i Deçanit,Bashkim Ramosaj, tha se me së shumti do përfitojnë banorët e komunës.

“Në bazë të kësaj marrëveshje të bashkëpunimit, po besoj që qytetarët e Deçanit janë përfituesit më të mëdhenj, sepse po bëhet fjalë për një investim 8 milionë euro nga Ministria e Infrastrukturës”, tha Ramosaj.

Në mars të vitit të kaluar, KALLXO.com raportoi se vetëm 300 mijë euro ishin ndarë për ketë projekt rrugor që ka edhe karakter nacional.

Pak Para Për Rrugën Nacionale Deçan-Plavë

Po ashtu ministri Lekaj sot ka vizituar edhe komunën e Junikut ku ka nënshkruar edhe një marrëveshje bashkëpunimi për disa projekte në ketë komunë.

 

09 Shkurt 2018 - 18:24

Shkodran Nikçi 09/02/2018 - 18:24
NDËRVEPRIMI0
Prishtina Insight