Policia e Kosovës organizon konferencë me drejtuesit e policive rajonale

Policia e Kosovës e ndihmuar nga Misioni i EULEX-it, organizon konferencë rajonale dy ditore me drejtuesit e policive të shteteve rajonale, të Shqipërisë, Kroacisë, Maqedonisë dhe Sllovenisë, të cilët deri më tani kanë konfirmuar pjesëmarrjen e tyre në Prishtinë.

Nikoqir i kësaj konference është Policia e Kosovës, në krye me ushtruesin e detyrës së Drejtorit të Përgjithshëm të Policisë së Kosovës, Naim Rexha. Konferenca vlerësohet si një faktor mjaft i rëndësishëm dhe i suksesshëm, në bashkëpunim dhe ndikim të stabilitetit rajonal.

Kjo konferencë është si vazhdimësi e konferencës së suksesshme të drejtuesve të policive të mbajtur në Shkup me 9 dhe 10 shtator të vitit 2016, dhe tani është vendosur të mbahet në Kosovë me 17 dhe 18 maj 2018 me ftesë të Policisë së Kosovës.

Qëllimi primar i kësaj konference është intensifikimi i bashkëpunimit të ndërsjellët rajonal, mbledhja dhe shkëmbimi i informacioneve, në interes të parandalimit të kërcënimeve dhe rreziqeve strategjike që i paraqet krimi i organizuar ndërkombëtar dhe terrorizmi, e të cilat do të ndikojnë pozitivisht në stabilitetin rajonal.

Vlen të theksohet se pjesë e kësaj konference përveç drejtorëve të përgjithshëm të policive rajonale, prezentë do të jenë edhe drejtorët e hetimeve nga të gjitha vendet pjesëmarrëse.

16 Maj 2018 - 20:33

Dorentina Kastrati 16/05/2018 - 20:33
NDËRVEPRIMI0
Prishtina Insight
NA NDIQNI

Send this to a friend