Çmimet e reja, që do të hynin në fuqi nga nesës, sipas marrëveshjes mes kafeneve të Gjilanit - Foto: AKK

Pengohet Marrëveshja e Kafeneve të Gjilanit për Rritje të Çmimeve

Pas marrjes së informacioneve nga burimet e ndryshme dhe nga rrjetet sociale, Autoriteti Kosovar i Konkurrencës me efikasitet dhe saktësi parandaloi implementimin e marrëveshjes së ndaluar në formë të bashkërenduar të kafeneve në qytetin e Gjilanit për rritje dhe fiksim të çmimeve për disa artikuj.

Të shtunën në mbrëmje inspektorët hetues pas marrjes së informacioneve vepruan duke i identifikuar kafenetë të cilat ishin bashkëpjesëmarrëse në takimin e dyshuar për arritjen e marrëveshjes, thekson një komunikatë e Autoritetit Kosovar të Konkurrencës (AKK).

Fiksimi i çmimit është i ndaluar dhe i ndëshkueshëm sipas Ligjit për Mbrojtjen e Konkurrencës.

Meqë kjo marrëveshje ishte planifikuar të implementohet të hënën, më 24.04.2017, inspektorët hetues sipas detyrës zyrtare avokuan tek pronarët e këtyre kafeneve se implementimi apo hyrja në fuqi e kësaj çmimore, çmimore e cila u hartua me marrëveshje nga të gjithë pronarët apo përfaqësuesit e kafeneve, pjesëmarrës në kartel, është e kundërligjshme dhe që implementimi i ngritjes dhe fiksimit të çmimit do të prodhonte pasoja ligjore.

Çmimet e reja që do të hynin në fuqi nga data 24 prill 2017 – Foto: AKK

Sipas komunikatës, pronarët e kafeneve me të cilët inspektorët hetues avokuan për rëndësinë e Ligjit për Mbrojtjen e Konkurrencës, e kuptuan shumë qartë se marrëveshjet e tilla kufizojnë mundësinë e përzgjedhjes nga konsumatori dhe që kufizimi i çmimeve në një vend me ekonomi të tregut me konkurrencë të lirë nuk lejohet.

Në gusht të vitit të kaluar, “Gazeta Jeta në Kosovë“ kishte shkruar për një marrëveshje në mes pronarëve të disa kafeneve e restoranteve në Ferizaj për shtrenjtimin e makiatove.

Kafenetë e Ferizajt Rrezikojnë Gjoba për Shtrenjtim të Makiatos

Autoriteti i Konkurrencës e kishte vlerësuar naive marrëveshjen për shtrenjtimin e makiatove në Ferizaj.

http://kallxo.com/naive-marreveshja-per-shtrenjtimin-e-makiatove-ne-ferizaj/