Kadri Veseli - Foto: Facebook

PDK Shpall Zgjedhjet e Brendshme

Partia Demokratike e Kosovës (PDK) ka shpallur sot zgjedhjet e brendshme, vetëm një ditë pasi mori një rezultat me të cilin kryetari i saj, Kadri Veseli tha se nuk është ikënaqur.

PDK ka humbur disa komuna në balotazhin e djeshëm, ndërsa nuk ka arritur t’i kthejë disa të tjera që i kishte humbur katër vite më parë.

Në këtë situatë, siç njofton një komunikatë e lëshuar nga PDK, Veseli, në përputhje me vendimin që është marrë në mbledhjen e Këshillit Drejtues, më 29 korrik 2017, dhe në përputhje me Statutin e PDK-së, nga sot shpall zgjedhjet e brendshme partiake.

“Partia Demokratike e Kosovës fton të gjitha strukturat e veta, nëpër degë, nëndegë dhe seksione, të fillojnë përgatitjet për organizimin e zgjedhjeve të brendshme”, thuhet në komunikatë.

PDK falënderoi secilin qytetar që besoi në vizionin, platformën, kandidatët e saj për Kryetarë të Komunave, kandidatët për këshilltarë të Kuvendeve Komunale në zgjedhjet e fundit lokale që u zhvilluan në Republikën e Kosovës.

“Partia Demokratike e Kosovës pret numërimin e secilës votë, për ta çuar në vend vullnetin e plotë të qytetarëve, pasi që ende janë të panumëruara edhe mijëra vota me kusht nëpër disa komuna. Për këtë, ftojmë të gjitha institucionet përgjegjëse, si dhe partitë politike, që të kontribuojnë për një përfundim demokratik të këtij procesi zgjedhor – në të cilin u dëshmua demokraci e lartë e kulturë evropiane”, thuhet në komunikatë.

PDK i ka ftuar gjithë anëtarësinë e saj, të gjithë qytetarët, në veçanti të rinjtë dhe gratë, që “të bashkohen në vizionin e Partisë Demokratike dhe të marrin pjesë në këto zgjedhje të cilat do të mbahen në javët dhe muajt në vijim”.

“PDK mbetet lidere në shumë ndryshime, në sjelljen e figurave të reja në skenën politike, njerëz profesionistë, si dhe për hapësirën që u ka dhënë grave e të rinjve dhe do të vazhdoj edhe më fuqishëm në Konventën e ardhshme zgjedhore”, thuhet në komunikatën e PDK-së.