Paraburgim Inspektorit që Kërkoi Ryshfet

Gjykata Themelore në Gjilan ia caktoi paraburgimin prej një muaji inspektorit të komunikacionit të Kamenicës me inicialet S. D. nën dyshimet se i kërkoi ryshfet një biznesmeni.

“I pandehuri S. D., në pozitën Inspektor i Komunikacionit në Komunën e Kamenicës, gjatë ditës së djeshme ka kërkuar ryshfet nga pronari i një kompanie të biznesit, për të kryer një shërbim”, thuhet në komunikatën e Gjykatës në Gjilan.

Sipas komunikatës, pasi biznesmeni kishte raportuar kërkimin e ryshfetit, inspektori ishte arrestuar në vend të punës.

“I dëmtuari menjëherë ka lajmëruar zyrtarët policorë, më pas organet e ndjekjes kanë ndërmarrë të gjitha hapat, duke aplikuar përdorimin e masave të fshehta të simulimit, ku i pandehuri është arrestuar në vendin e punës”, thuhet më tutje në komunikatë.

Gjykata tregon në komunikatë se palët kanë të drejtë të ankohen në Gjykatën e Apelit rreth vendimit për paraburgim.

KALLXO.com ka shkruar edhe për raste tjera të marrjes së ryshfetit.