Në Sarajevë Protestohet Kundër Vendimit të Trump për Jerusalemin

Dhjetëra demonstrues kanë dalë sot në rrugët e Sarajevës për të protestuar kundër vendimit të presidentit amerikan, Donald Trump, për njohjen e Jerusalemit për kryeqytet të Izraelit.

Më se 100 protestues morën pjesë në këtë tubim të organizuar nga pjesëtarët e diasporës palestineze në Bosnjë-Hercegovinë dhe grupet e tjera, që kanë bartur mbishkrime në gjuhën angleze, në të cilat kritikoheshin Trumpi dhe Izraeli, ndërsa për Jerusalemin e quanin kryeqytet palestinez.

Shumë prej demonstruesve kishin ardhur në Bosnjë, derisa ajo ishte pjesë e ish-Jugosllavisë dhe kanë mbetur në këtë vend edhe në ditët e sotme.

Më herët këtë muaj, presidenti Trump ka shpallur se Uashingtoni e njeh Jerusalemin si kryeqytet të Izraelit.

Palestinezët pretendojnë se pjesa lindore e Jerusalemit do të jetë kryeqytet i shtetit të tyre të ardhshëm. (REL)