Mustafa: As Kosova, as Peja Nuk Humbin Tokë me Demarkacion
Kryeministri Isa Mustafa është i bindur se Kosova nuk do ta humbë asnjë metër katror nga demarkacioni i kufirit me Malin e Zi.
Në pikën kulmore të debatit për ratifikimin e marrëveshjes për kufirin me Malin e Zi, Mustafa i është përgjigjur në Facebook shqetësimit të një qytetari rreth madhësisë gjeografike të Kosovës pas ratifikimit eventual të marrëveshjes së nënshkruar në gusht të vitit të kaluar, e cila po kundërshtohet ashpër nga partitë opozitare.
Sipas Mustafës, Kosova i ka 10.906 kilometra katrorë dhe Komuna e Pejës i ka 603 kilometra katrorë, aq sa i ka pasur më herët.
Mbrëmë, Mustafa përmes një shkrimi në Facebook kishte sqaruar se kufiri me Malin e Zi është në përputhje të plotë me Deklaratën e Pavarësisë dhe Pakon Ahitsaari, duke cituar disa pika të tyre që parashohin përcaktimin e kufirit sipas kritereve të aplikuara nga Komisioni.
“Është shumë e qartë se pavarësia nuk është shpallur në bazë të hartave të viteve të tridhjeta, të dyzeta apo të pesëdhjeta të shekullit të kaluar, por mbi bazën e territorit që Kosova ka pasur në vijat kufitare më 31 dhjetor të vitit 1988”, ka thënë ai, me këtë rast.
Ndërkaq, pyetjeve të disa qytetarëve se sa kilometra katror i ka Kosova sipas këtij procesi, kryeministri Mustafa i është përgjigjur duke thënë se sipas Komisionit Shtetëror Kosova i ka 10.906 kilometra katror dhe Komuna e Pejës i ka 603 kilometra katror.
“Sipas Komisionit Shtetëror për shënjimin e Kufirit ndërmjet Kosovës dhe Malit të Zi, në bazë të këtij procesi që ne po e adresojmë, Republika e Kosovës i ka 10.906 kilometra katror. Po ashtu, Komuna e Pejës i ka 603 kilometra katror, aq sa i ka pasur më herët dhe nuk e humb asnjë metër katror”, ka qenë përgjigja e Mustafës.
