Ministri i MPMS-së, Skender Reçica - Foto: Facebook

Ministri Nuk e Di Kur Hapen Strehimoret për Viktimat e Dhunës

Ministri i Punës dhe Mirëqenies Sociale, Skender Reçica, ka thënë se nuk e di se kur do ta marrin buxhetin strehimoret ku strehohen viktimat e dhunës në familje.

NDËRLIDHUR

Reçica tha se pas ndarjes së buxhetit duhet ende kohë për alokimin e tij. “Të gjithë jetojmë në Kosovë dhe e dimë se kur alokohet buxheti edhe 30 ditë mbesin”, tha Reçica për KALLXO.com.

I pyetur se në cilën fazë është procesi, ministri tha se nuk e di. “Duhet ta thirrni një zyrtar financiar apo ta thirrni ministrin e Financave”, tha ai.

Ministri tha se obligimi moral dhe ligjor është kryer me ndarjen e buxhetit për qendrat e strehimit.

Ndërkaq, ngjashëm u shpreh edhe zyrtarja për informim pranë Ministrisë së Punës dhe Mirëqenies Sociale, Mimoza Kqiku.

“Më 12 janar, ne i kemi paraqitur Qeverisë propozim-vendimin për ndarjen e mjeteve në vlerë prej 65.000 euro nga ana e Ministrisë së Punës dhe Mirëqenies Sociale, për mbështetje të disa OJQ-ve, të cilat ofrojnë shërbime për strehim të viktimave të dhunës në familje, mbrojtjen e fëmijëve dhe viktimave të trafikimit. Qeveria e Republikës së Kosovës e ka miratuar propozim-vendimin tonë. Javën e kaluar është lëshuar buxheti. Janë disa procedura të cilat ne duhet t’i zbatojmë dhe duhet t’u përmbahemi”, tha Kqiku.

Pas raportimit të KALLXO.com për mbylljen e qendrave të strehimit të viktimave të dhunës familjare për shkak të mungesës së buxhetit kishte reaguar Qeveria, duke ndarë buxhet për to.

Pas Raportimit të KALLXO.com, Qeveria Ndan Buxhet për Strehimoret e Mbyllura

KALLXO.com sot e ka konfirmuar se vazhdojnë të jenë të mbyllura strehimorja e Gjilanit, Pejës dhe Mitrovicës.

29 Janar 2018 - 23:28

Ardit Kika 29/01/2018 - 23:28
NDËRVEPRIMI0
Prishtina Insight