'Grupi i Dobrosinit' në gjykatë. Foto: Kallxo.com

Lirohen të Akuzuarit për Sulmin ndaj Policisë Serbe

Ngjarja e cila kishte shkaktuar reagime të shumta nga të dyja shtetet sot mori epilogun përfundimtar nga gjyqësori i vendit.

NDËRLIDHUR

Valon Jashari, Gazmend Xhemshiri, Gazmend Lakna, Skender Jashari, Abdullah Zogaj, Enver Musolli, Skender Selmani, Muhamed Aliu, Qëndrim Rexhaj, nëntë akuzuarit për kryerjen e veprave terroriste e pjesëmarrjen në grup terrorist ndaj policëve serbë në Dobrosin, u shpallën të pafajshëm nga Gjykata Themelore e Gjilanit.

Përveç këtyre dy veprave penale, katër nga nëntë të akuzuarit, ngarkoheshin edhe me veprën e tretë penale- atë të shkaktimit të rrezikut të përgjithshëm.

E për këtë vepër penale, trupi gjykues në krye me gjykatësin Zyhdi Haziri nxorën aktgjykim refuzues.

Kjo lëndë gjyqësore ndaj të akuzuarve për këtë sulm e ngritur nga prokuroria e EULEX-it ishte kthyer në rigjykim në Gjykatën e Gjilanit nga Gjykata Supreme përmes aktgjykimit së lëshuar më 19 prill të vitit 2016, derisa në vitin 2013 të akuzuarit qenë dënuar nga Gjykata Themelore në Gjilan me një total prej 60 vjetësh burgim.

Në mes datave 17 maj dhe 7 tetor 2012 punkti i policisë serbe në Dobrosin të Bujanocit ishte sulmuar tri herë radhazi me armë zjarri.

Pak kohë pas incidentit, nën urdhrat e prokurorëve të EULEX-it, policia arrestoi këta nëntë persona si të dyshuar për këto sulme.

Të nëntit u akuzuan nga prokuroria se gjatë periudhës prej 29 prillit 2012 kanë pasur për qëllim që ta shtyjnë Qeverinë e Republikës së Serbisë që të pushojë veprimet policore në rajonin e Bujanovcit, pjesëtarët e policisë serbe të kombësisë shqiptare të lënë vendin e tyre të punës, si dhe komunitetin ndërkombëtar të vendosë forcat paqeruajtëse në rajon.

Sipas kësaj, prokuroria pretendonte se të akuzuarit kishin kryer vepra terroriste duke shkaktuar rrezik të përgjithshëm më 28 qershor 2012 rreth orës 4.00- 4.30 pasdite, kur ishin në territorin e Republikës së Kosovës, komuna e Gjilanit, afër linjës së kufirit administrativ në mes Kosovës dhe Serbisë,.

Atë ditë, sipas aktakuzës qëllimisht dhe në bashkëkryerje të akuzuarit kanë gjuajtur jo më pak se 157 fishekë nga tri armët e poseduara në mënyrë të paligjshme të kalibrit 7.62 mm në stacionin e Policisë Kufitare Serbe, që gjendet rreth 300-400 metra larg nga linja e kufirit administrativ, afër fshatit Dobrosin (Serbi), duke rrezikuar jetën e policit serb Branislav Markoviq dhe jetën e zyrtarëve të tjerë.

Më tej, prokuroria pretendonte se ata në mënyrë të paligjshme kanë poseduar së paku një armë të llojit “TT” të kalibrit 7.62 mm, dy armë automatike AK 47 të kalibrit 7.62 mm, dy armë automatike AK 47 të kalibrit 7.62x 39 mm, një mitraloz të lehtë të kalibrit 7.62×54 mm, dy pushkë snajper të kalibrit 12.7 mm dhe një raketahedhës.

06 Dhjetor 2017 - 15:32

Arita Gërxhaliu 06/12/2017 - 15:32
NDËRVEPRIMI10