Komisionit për Buxhet e Financa
Kuvendi Kërkon Ligj të Ri pas Hulumtimit të BIRN
Komisioni për buxhet dhe financa i Kuvendit të Kosovës diskutoi të mërkurën nevojën e legjislacionit të ri për institucionet joqeveritare mikrofinanciare, duke thënë se është koha që vendi të adaptojë rregulla të reja.
Kryesuesi i komisionit, Naser Osmani, tha se duhet të bëhen hapa drejt hartimit të projektligjit për “Institucionet mikrofinanciare OJQ me status të beneficuar”.
“Nuk po kemi bazë ligjore për problemin e institucioneve mikrofinanciare OJQ; [por] s’po mundemi me zgjedh si me i bart mjetet e donacionit në aksionar, s’po mundemi me zgjedh as me ligj e as me diçka tjerër; përndryshe ne jemi peng, nuk kemi ligj”, tha Osmani.
Osmani e bëri këtë deklaratë disa orë pasi BIRN publikoi një hulumtim për KEP-in, një insitucion bamirës mikrofinanciar, i cili i ka bërë konkurrencë shumë bankave komerciale dhe ka shpenzuar miliona euro me ligjshmëri të dyshimtë.
Osmani tha se komisioni duhet ta studiojë legjislacionin përkatës në vendet ku ky problem është adresuar me sukses, duke shtuar se institucionet e Kosovës po kërkojnë ekspertë të përshtatshëm, por nuk po gjejnë asnjë.
Ai ka mohuar se diskutimet kanë qenë të lidhura me hulumtimin e BIRN, duke sugjeruar se ishte rastësi që u diskutua në të njëjtën ditë.
“Ky ligj u diskutua sot jo për ndonjë qëllim të caktuar por ka qenë pjesë e punës së komisionit që nga viti 2015, të cilin nuk kemi arritur ta draftojmë dhe e kemi bartur në vitin 2016”, tha Osmani për KALLXO.com.
Ai shtoi se ligji i ri do të përgatitet brenda vitit 2016.
Anëtarja e komisionit parlamentar, Besa Gaxherri, pohoi se projektligji ka filluar të shqyrtohej që nga viti i kaluar dhe se është i përfshirë në planin e sivjetshëm të punës.
Sidoqoftë, kjo lëndë nuk figuronte si pjesë e agjendës së diskutimeve të komisionit të publikuar në uebfaqen e Kuvendit.
Deputeti i Kuvendit të Kosovës, Muharrem Balaj, tha se së paku prej qershorit të vitit 2015 kur është bërë anëtar i komisionit, ky i fundit nuk e ka shqyrtuar asnjëherë projektligjin.
Por Balaj shtoi se një përditësim legjislativ është i nevojshëm.
