Kryeshefi i Postës Denoncohet për Kërcënim

Gazmend Isufi, ish drejtor i Kontrollit të Brendshëm në Postën e Kosovës, ka raportuar në polici të jetë kërcënuar nga Kryeshefi i Postës, Sejdi Hoxha.

Rasti është raportuar pasditën e 17 janarit në stacionin e policisë Qendra në Prishtinë.

KALLXO.com ka kontaktuar edhe zëdhënësen e policisë, Florie Ahmeti- Haziraj, e cila ka thënë se një rast kanosje është raportuar më 17 janar në sheshin ‘Skënderbeu’.

Prokuroria e rastit, Nebahate Salihu, ka konfirmuar se kanë pranuar pretendimet e Isufit për drejtorin Hoxha.

“Po, jemi të njoftuar lidhur me rastin, dy personat që ju përmendët janë intervistuar dhe prokuroria është duke u marrë me rastin”, tha Salihu për KALLXO.com.

I pyetur nga KALLXO.com në lidhje me rastin, Kryeshefi Ekzekutiv në Postë, Sejdi Hoxha përmes emailit, ka thënë se nuk ka pasur asnjë kontakt me Isufin.

“Është plotësisht e pavërtetë. Nuk kam shkëmbyer asnjë fjalë me të. Për këtë kam edhe dëshmitarë që kanë qenë të pranishëm në Teatrin Kombëtar, ku kam qenë i ftuar nga Zyra e Kryeministrit në promovimin e pullës postare”, thuhet në përgjigjen e Hoxhës për KALLXO.com.

KALLXO.com nuk ka arritur që të komunikojë me ish- Drejtorin e Kontrollit të Brendshëm në Postë, Gazmend Isufin, pasi ky i fundit ka thënë se është jashtë vendit.

Gazmend Isufi është përballur me ligjin por ishte shpallur i pafajshëm nga Gjykata e Apelit.