Ramush Haradinaj - Foto: Facebook

Kryeministri që Vendos Kanunin Para Ligjit për Veprat e Dënueshme Deri në 5 Vjet Burg

Deklarata e djeshme e kryeministrit Ramush Haradinaj, ku ai pranon publikisht se ai gjuan me armë dhe se “nuk bohet kiameti me gjujtë”, mund të prodhojë konsekuenca ligjore për faktin se gjuajtja me armë mund të dënohet deri në 5 vjet burg me Kodin Penal të Kosovës.

Oda e zëvendëskryeministrit Fatmir Limaj ishte vendi ku kishte gjuajtur me armë ministri i Diasporës, Dardan Gashi. E videoja ishte bërë publike në media.

Si pasojë, Policia e Kosovës ka ushtruar kallëzim penal në Prokurori pas hetimeve për të shtënat me armë zjarri në ambient të mbyllur, ku përfshihet edhe ministri Gashi.

I pyetur se çfarë mendon për këtë rast, kryeministri ka thënë se “nuk është kiamet kjo punë”, ngase edhe ai gjuan në oda, duke u thirrur në Kanun. Por, gjuajtja me armë është vepër e sanksionueshme deri në 5 vjet burg me Kodin Penal të Kosovës. E krahasimi që kryeministri bën mes gjuajtjes me armë dhe tejkalimit të shpejtësisë me veturë është i gabueshëm, ngase e para është vëpër penale e dënueshme me burg, ndërsa e  dyta vepër kundërvajtëse që sanksionohet me gjobë.

“Nuk e di qëllimin e asaj ndeje, por të jem i sinqertë, edhe unë qes n’oda vet. Më ka ndodhë në Dukagjin ‘kanunçe’… Ta sjell i zoti i shtëpisë armën që të gjuash, dhe gjuan”, ka deklaruar kryeministri në emisionin “Interaktiv”.

Kodi Penal në nenin 365 të tij flet për shkaktim të rrezikut të përgjithshëm, ku në pikën 1 thuhet: “Kushdo që me anë të armëve shkakton rrezik të madh për jetën e njerëzve apo dëm të konsiderueshëm pasuror, dënohet me burgim prej gjashtë muaj deri në pesë vjet”.

Ndërsa në nenin 3 thotë: “Nëse vepra penale nga paragrafi 1. ose 2. i këtij neni kryhet në vendin ku janë të pranishëm një numër i madh i njerëzve, kryesi dënohet me burgim prej një  deri në tetë  vjet”.

Tutje, kryeministri bën krahasim me “tejkalim të shpejtësisë”.

“Çka të bësh… nuk është mirë… është shkelje ligjore sikur kur e tejkalon shpejtësinë me veturë, por ndodh kjo në Kosovë”, ka deklaruar Haradinaj.

Por, kjo vepër nuk cilësohet si penale, por kundërvajtëse që dënimi varion konform tejkalimit të shpejtësisë.

Më pas, Haradinaj propozon edhe ndërrimin e Ligjit.

“Mund ta bëjmë dhe me ligj ndoshta që në raste gëzimi të përdorim armën”, ka thënë ndër tjera Haradinaj.

E me këtë pajtohet edhe eksperti i sigurisë, dikur pjesë e AAK-së, Burim Ramadani.

“Megjithëse shkelja e ligjit është shkelje e ligjit, formulimet e hapura të temave tabu besoj se mund t’i kontribuojnë gjetjes së zgjidhjes së re ligjore.  Pra, deklarata e kryeministrit realisht do të duhej të përcillej me një koncept të ri ligjor për të konservuar elementet tradicionale. Patjetër se çështjet e sigurisë duhet të trajtohen në aspekt ligjor, edhe pse në ambientet tradicionale dhe konservatore të Kosovës çështjet ligjore mund të jenë jolegjitime”, ka thënë ai.

Por në parim, Ramadani tha se pavarësisht nivelit që një qytetar i Kosovës ka në kuptimin e pozitës politike apo shoqërore, përdorimi i armëve ilegale është vepër e dënueshme dhe si e tillë e papranueshme.

I pyetur nga KALLXO.com se si e komenton deklaratën e kryeministrit, ish-ministri i Punëve të Brendshme, Skender Hyseni, ka thënë se nuk e ka dëgjuar/lexuar këtë deklaratë. Ndërsa, në parim deklaron se Kosova ka rregullativë ligjore për këtë fushë dhe dalja nga këto është shkelje e ligjit.

Policia e Kosovës ka thënë për “Gazetën Jeta në Kosovë” që nuk kanë statistika të ndara vetëm për personat që kanë pësuar fatalisht nga gjuajtja me armë, por në statistikat e përgjithshme të vrasjeve, kanë thënë që përfshihet edhe kjo pjesë.

“Nga janari deri në nëntor të këtij viti janë 24 persona të vrarë”, është statistika e PK-së.

Në vitet paraprake kjo shifër ka qenë edhe më e lartë, shembull në vitin 2013 ishte 44 persona të vrarë.

Për veprimet të rrezikshme me armët Policia ka konfirmuar  se në muajt janar-nëntor 2017 ka konfiskuar 1,050 armë të ndryshme, duke shtuar se çdo vit konfiskon nga 1,200 deri në 1,500 armë të llojeve të ndryshme.

Po me Kodin Penal, në nenin 374, ku flitet për mbajtjen në pronësi, kontroll ose posedim të paautorizuar të armëve thuhet: “Kushdo që mban në pronësi, kontrollon ose posedon armë në shkelje me ligjin e zbatueshëm lidhur me armë të tilla, dënohet me gjobë deri në shtatëmijë e pesëqind (7.500) euro ose me burgim deri në pesë (5) vjet.”

KALLXO.com ka raportuar edhe për rastet, ku janë arrestuar persona që kanë postuar fotografi me armë në Facebook.

Kosova ka ligje tjera që rregullojnë përdorimin e armëve, si Ligji për Armët.