KOSID-i Kërkon të Shqyrtohet Peticioni i Qytetarëve Kundër Shtrenjtimit të Rrymës
Konzorciumi i Shoqërisë Civile për Zhvillim të Qëndrueshëm kërkon nga Kuvendi i Kosovës që të merren parasysh të gjitha pikat e peticionit kundër ngritjes së çmimit të energjisë elektrike.
Me anë të këtij peticioni në shtator të vitit të kaluar organizatorët dhe nënshkruesit patën kërkuar nga Kuvendi i Kosovës që përmes një rezolute të anulojë vendimin e Zyrës së Rregullatorit të Energjisë që më 29 gusht shtrenjtoi rrymën për 5.18 për qind.
Me peticion gjithashtu kërkohej të amendamentohet Ligji për Tatimin mbi Vlerën e Shtuar, ku do të largohej TVSh-ja prej 16 për qind nga fatura e energjisë elektrike.
Në një konferencë për media të zhvilluar sot, përfaqësues të KOSID-it, ngritën shqetësimet që Kuvendi nuk e ka në rend të ditës të seancës së stome plenare këtë peticion.
Kushtrim Puka nga KOSID u shpreh se peticioni duhet të shqyrtohet me të gjitha pikat që gjenden në të, duke mos i ndryshuar ato.
“Peticioni të shqyrtohet peticioni i tërësishëm, me të gjitha kërkesat që kanë qenë, të cilat janë nënshkruar prej 33 mijë qytetarëve, e jo të modifikohen”, tha Puka.
Në Kuvendin e Kosovës ky peticion u diskutua para një jave, ndërsa u nxorën për t’u votuar jo pikat e peticionit, por pikat e modifikuara nga Komisioni për Peticione.
Mbeti e paqartë nëse këto pika të modifikuara kaluan në Kuvend, ose jo, pasi për to votuan 42 deputetë e katër ishin kundër, në kohën kur në seancë të pranishëm ishin 65 deputetë.
Rinora Gojani nga KOSID-i apeloi tek deputetët e Kuvendit të Kosovës që të kenë parasysh propozimin për ndryshimin e Ligjit për Zyrën e Rregullatorit të Energjisë.
“Sipas së cilit duhet të obligohet që ZRrE-ja të ndryshojë rregullat për vendosjen e çmimeve”, shtoi ajo.
Po ashtu, KOSID-i kërkoi zbatimin e ligjeve që lidhen me energjinë.
“Kërkojmë vetëm të zbatohen ligjet të cilat janë në fuqi dhe të bëhen disa ndryshime të nevojshme”, tha Gojani.